सवारी व्यवस्थापन, दुर्घटना न्यूनीकरण गर्न तथा ट्राफिक जनचेतना अभिवृद्धिका लागि म्याग्दीमा आयोजित ट्राफिक सप्ताहमा करिब २५ हजार सर्वसाधारण तथा नागरिकहरु लाभान्वित भएका छन् । सातदिनसम्म निरन्तर सडक सुरक्षा सम्बन्धी गतिबिधि सञ्चालनपछि सप्ताहव्यापी अभियानको सोमबार सडक सुरक्षा सम्बन्धि नागरिक संवाद गरी औपचारिक समापन गरिएको हो ।
जिल्ला प्रहरी कार्यालय म्याग्दी र जिल्ला ट्राफिक प्रहरी कार्यालय म्याग्दीको संयुक्त आयोजनामा सञ्चालित ट्राफिक सचेतना कार्यक्रम अन्तरगत विभिन्न गतिविधिबाट २४ हजार ९ सय ५५ जना सर्वसाधारणहरु लाभान्वित भएको जिल्ला ट्राफिक प्रहरी कार्यालयका प्रमुख, प्रहरी वरिष्ठ नायब निरीक्षक राजकुमार केसीले बताए ।
ट्राफिक सप्ताह अन्तरगत २ सय ३० वटा कार्यक्रममा सचेतना ¥याली, जनचेतनामूलक पम्प्लेट वितरण, पैदल यात्रुलाई बाटो काट्न सिकाउने, सडकका खाल्डाखुल्डी पुर्ने, सवारी चालक र सहचालकलाई प्रशिक्षण, सिट क्षमता अनुगमन, शैक्षिक संस्थामा विद्यार्थीहरुलाई ट्राफिक नियमको प्रशिक्षण, स्ट्रिकर टाँस्ने, रक्तदान लगायतको सप्ताहव्यापी कार्यक्रम गरिएको थियो ।
सप्ताहको अन्तिम दिन बेनीबजारस्थित बिरेन्द्रचोकमा आयोजित कार्यक्रममा सडक दुर्घटन न्यूनिकरणको लागि ट्राफिक सप्ताहले महत्वपूर्ण भुमिका खेलेको बताएका थिए । बेनी नगरपालिकाका मेयर सुरत केसीले सडकमा हुने सानो लापरबाहीले ठूलो दुर्घटना निम्तिन सक्ने अवस्थालाई मध्यनजर गरी छाडा पशुचौपायाको ब्यवस्थापन गरिएको र अतिक्रमित सार्वजनिक स्थानबाट समेत संरचना हटाउने लगायतका कार्यहरूलाई प्राथमिकता दिएको बताए ।
‘दुर्घटनाको मुख्य कारण मानवीय लापरबाही नै देखिएकाले यसलाई घटाउन सबैजना सचेत बन्नुपर्छ,दुर्घटनाको मुख्य कारण मानवीय लापरबाही नै देखिएकाले यसलाई घटाउन सबैजना सचेत बन्नुपर्छ’ मेयर केसीले भने ।
सोही अवसरमा प्रहरी नायव उपरीक्षक भरत श्रेष्ठ, जिल्ला न्यायाधिवक्ता खेमराज पाठक, स्रेस्तेदार भोलाराज रेग्मी, जिल्ला समन्वय अधिकारी राजेन्द्र प्रसाद पोख्रेल, म्याग्दी उद्योग वाणिज्य संघका अध्यक्ष सुविन श्रेष्ठ लगायत जिल्लाका सरोकारवाला निकायका प्रतिनिधिहरूको उपस्थिति रहेको थियो । कार्यक्रममा सवारीसाधनका चालकले बजार क्षेत्रमा सडकमै खेल्ने, पदैलयात्रीका कारण हुने दुर्घटनामा समेत चालकलाई नै दोषी देखाउने, कुकुर नियन्त्रण नहुदाँ दुर्घटना बढेको लगायतका गुनासो गरिएको थियो ।
