नेपाल पत्रकार महासंघ म्याग्दी शाखाको आठौं साधारण सभा शुक्रबार सम्पन्न भएको छ । बेनी नगरपालिका-७, बिरेन्द्रचोकमा रहेको आफ्नै भवनमा आयोजित साधारणसभाको नेपाल पत्रकार महासंघ गण्डकी प्रदेशका अध्यक्ष नारायण शर्माले उद्घाटन गदैं गण्डकी प्रदेशभित्र म्याग्दी शाखाले संस्थागत विकासमा खेलेको भूमिकाको प्रशंसा गर्नुभएको थियो ।
साधारणसभामा महासंघको केन्द्रिय प्रतिनिधि पूर्व केन्द्रिय सदस्य हरिनारायण गौतमले पत्रकारहरूको संस्थागत विकासमा केन्द्रित हुनुपर्नेमा बताउनुभयो ।
महासंघ गण्डकी प्रदेशका महासचिव गोविन्द सुबेदीले पत्रकारिताको क्षेत्रमा देखिएका समस्या समाधानमा पत्रकारको साझा धारणा हुन्ुपर्नेमा जोड दिनुभयो ।
साधारणसभाको अवसरमा सञ्चारिका समुह म्याग्दीकी अध्यक्ष देवी केसी, जनपत्रकार संगठन म्याग्दीका अध्यक्ष बादल शाही, फोनिज म्याग्दीका अध्यक्ष साधन राम्जाली,क्रान्तिकारी पत्रकार संघ म्याग्दीका अध्यक्ष कमल खत्री,प्रेस चौतारी म्याग्दीका अध्यक्ष प्रताप बानियाँ,प्रेस यूनियनका अध्यक्ष राकेश शर्मा,नेपाली कांग्रेसका नेता अजयमिलन श्रेष्ठ, नेकपा एमालेका जिल्ला अध्यक्ष बालकृष्ण सुबेदी, महासंघका संस्थापक सदस्य सुवासकुमार श्रेष्ठ, पूर्व अध्यक्ष तारानाथ शर्मा, संस्थापक अध्यक्ष घनश्याम खड्काले पत्रकारिताको अवसर, चुनौती र देखिएका समस्याका बारेमा बोल्नुभएको थियो ।
साधारणसभाको अवसरमा म्याग्दीलाई हिमाली जिल्लामा सुचिकृत गरिएपनि कार्यान्वयन नभएको, सञ्चारगृह सञ्चालन, न्यू मिडियाको नाममा फेक समाचार, सामाजिक सञ्जालबाट हुने गलत गतिविधिको नियन्त्रण तथा पत्रकारिताको अवसर, चुनौती र देखिएका समस्या लगायतका विषयमा सम्बन्धित निकायसँग समन्वयको आवश्यकता रहेको बताइएको थियो । 
पत्रकार महासंघ गण्डकी प्रदेशका बरिष्ठ उपाध्यक्ष दिपक भट्टराई लगायत महासंघका साधारण सदस्यको उपस्थिती रहेको साधारणसभाको अध्यक्षता अध्यक्ष प्रकाश पौडेल, स्वागत उपाध्यक्ष हरिकृष्ण गौतम, आर्थिक प्रतिवेदन कोषाध्यक्ष अमित विश्वकर्मा र प्रगति प्रतिवेदन सहित कार्यक्रमको सञ्चालन सचिव सन्तोष गौतमले गर्नुभएको थियो । पत्रकार महासंघको गण्डकी प्रदेशका ११ जिल्लामा साधारणसभा गर्ने म्याग्दी पहिलो शाखा भएको छ ।
