काठमाण्ठौमा जारी सातौं दक्षिण एसियाली कराते च्याम्पियनसिपमा म्याग्दीका मार्शल गर्बुजाले स्वर्ण पदक जितेका छन् । त्रिपुरेश्वरस्थित राष्ट्रिय खेलकुद परिषद्को कभर्डहलमा भएको प्रतिस्पर्धामा म्याग्दीको रघुगंगा गाउँपालिका–४,दर्मिजाका गर्बुजाले ५५ केजीमा पाकिस्तानका उस्मान सफिक लाई ७-५ मा पाखा लगाउँदै स्वर्ण पदक जितेका हुन् ।
म्याग्दी कराँतेका सिनियर खेलाडी समेत रहेका गर्वुजा नेपाल कराँते महासंघको अयोजनामा भएको छनौट खेलमा समेत स्वर्ण पदक जितेर साउथ एशियन कराँते च्याम्पियनका लागि छनौट भएका थिए ।
१८ बर्षिय गर्बुजाले प्रतियोगिताको सेमिफाइनलमा श्रींलकाका खेलाडी ६–१ को लजास्पद हार ब्यहोर्न बाध्य बनाएका थिए । विगत ८ बर्षदेखि कराँते खेलमा सक्रिय रहेका गर्बुजाले जिल्लास्तरीय, प्रदेशस्तरीय खेलमा दर्जनभन्दा बढी स्वर्ण पदक जितेका छन् ।
नेपालबाट छनौट भएर बंगलादेशमा समेत पुगेर कराँते खेलिसकेका गर्बुजा थाइल्याण्डमा हुने कराँते खेलका लागि समेत छनौट भइसकेका छन् ।‘यसपटक देशका लागि स्वर्ण पदक जित्दा निकै खुसी छु,‘अझै नियमित प्रशिक्षण सहितको सुविधा पाएमा राम्रो खेल प्रर्दशन गर्न सक्छु’ गर्बुजाले भने ।
म्याग्दीमा कराँतेका लागि पदकविहिन बन्न नदिने गर्बुजा अहिले गण्डकी प्रदेशबाट समेत राष्ट्रिय खेलका लागि रोज्जा खेलाडीभित्र पर्छन् । ‘पदक जित्दापनि हामीलाई भविस्यकै चिन्ता छ, खेलाडीको सुन्दर भविस्यको ग्यारेन्टी भए नेपालबाट नियमित कराँते खेल्न चाहन्छु’ गर्बुजाले भने ।
भविस्यमा लाहुरे हुने सपना बोकेका गर्बुजाले नेपालमा खेलाडीको भविस्य अझै सुन्दर नभएकाले बेलायती, सिंगापुर लाहुरे हुने सपना बुनेको समेत उनले बताए। बेनीको माउण्ट एभरेष्ट आवासीय माविबाट एसइइ दिएका गर्बुजाले प्रकाश माविबाट उच्च शिक्षा हासिल गरेका छन् ।
कराँतेको ब्लाकबेल्टकसेकेण्ड डन गर्बुजाले देशका लागि खेल्ने खेलाडीलाई प्रोत्साहन गर्न नसके धेरै पदक विजेता खेलाडी पलायन हुने समेत बताए ।
कराँतेमा क्षेत्रीय तथा राष्ट्रियस्तरमा यसअगाडी समेत स्वर्ण पदक जितेका गर्बुजा म्याग्दीको मात्रै नभई गण्डकी प्रदेशकै सर्वोत्कृष्ट कराँते खेलाडी भएको नेपाल कराँते महासंघ म्याग्दीका अध्यक्ष वीरेन्द्र श्रेष्ठले बताए ।
‘मार्सलले पदकविहिनको अवस्थामा खेल खेल्दैनन्, उनले धेरैजसो खेलमा पदक जितेका छन्, उनलाई खेलमै टिकाइरहन आवश्यक छ’ अध्यक्ष श्रेष्ठले भने । प्रतिभाशाली खेलाडी भएकाले थाइल्याण्डमा हुने ६ औं एशियन इनडोर मार्सल आर्टमा समेत स्वर्ण पदकको अपेक्षा गरिएको बताए ।
