गण्डकी प्रदेश सरकारले कोरोना महामारीबाट धराशायी बनेका व्यवसायलाई पुनर्जीवन दिन ‘व्यवसाय जीवन रक्षा कोष’ कर्जाका लागि ३० दिने सूचना निकालिएको छ । गतबर्ष पहुँचवाला र केही सिमित ब्यक्तिहरुले मात्रै लाभ लिएको गुनासो गरिएपछि यसबर्ष बाणिज्य बैंकसँगै विकास बैंकलाई थप गर्न कार्यविधि नै संसोधन समेत गरिएको छ ।
कोरोनाका कारण संकटग्रस्त साना तथा मझौला व्यवसायलाई सहज हुने गरी फागुन २० गतेदेखि चैत्र १९ गतेभित्र ५० लाख वा सो भन्दा कम कोरोबार गर्ने उद्यमी र ब्यवसायीलाई कर्जा उपलब्ध गराइने गण्डकी प्रदेश मुख्यमन्त्री तथा मन्त्रीपरिषद कार्यालयले जारी गरेको सूचनामा उल्लेख छ ।
साना उद्यमी तथा साना व्यवसायीलाई आर्थिक सहायता गर्ने गरी गण्डकी प्रदेशले एक अर्बको वार्षिक कोष खडा गर्ने घोषणा गरेको थियो । गत आवमा व्यवसायीलाई शून्य ब्याजदरमा ऋण दिन प्रदेश सरकारले नेपाल राष्ट्र बैंकसँग सहकार्य सम्झौता गरेको थियो ।
कोभिड प्रभावित साना तथा मझौला व्यवसायीलाई लक्षित गरी ल्याइएको कर्जा सुविधामा ५० हजारदेखि १५ लाख रुपैयाँसम्म शून्य ब्याजदरमा ऋण लिन पाइने छ । व्यवसाय जीवन रक्षा कर्जा ३ वर्षका लागि हुनेछ ।
कर्जा प्रक्रिया सरल बनाउन सामूहिक वा व्यक्तिगत जमानी, व्यवसायमा रहेको मौज्दात उपकरण, सवारीसाधन वा जग्गाजमीन धितो राख्न सकिनेछ । गण्डकी प्रदेश मुख्यमन्त्री पृथ्वीसुब्बा गुरुङको कार्यकालमा सुरु भएको कर्जा सुविधा वर्तमान मुख्यमन्त्री कृष्णचन्द्र पोख्रेलको पालामा समेत निरन्तरता पाएको छ ।
