ठाकुर सुबेदी/अर्मन
बस्ती माथिबाट अव्यवस्थित सडक निर्माण हुँदा म्याग्दीको मंगला गाउँपालिका-५ अर्मन गाउँ उच्च जोखिममा परेको छ । गत वर्षदेखि निर्माण सुरु गरेको किमचौर–कमिरे हुँदै धारा जोड्ने सडक तलको अर्मन पहिरोको जोखिम बढाएको हो । अर्मन बस्तीको सिरानीबाट स्थानीयको सहमति बिना सडक विस्तार गरेपछि तत्काल १२ घरधुरी उच्च जोखिममा रहेको स्थानीय तुलसी सुबेदीले बेनीअनलाइनलाई बताईन् ।
‘सिंगो अर्मन बस्ती नै पहिरोको चपेटामा पर्ने खतरा बढेको छ,‘लगातारको बर्षाले कुनैपनि बेला विस्थापित हुनुपर्ने अवस्था आएको छ’ सुबेदीले भनिन् । ठूल्ठूला ढुंगा बस्नी नजिक आइपुगेकाले तत्काल ब्यवस्थापन नगरे स्थानीय घनश्याम सुबेदी,डण्डपानी सुबेदी, लक्ष्मी सुबेदी, बुद्धिप्रसाद कँडेल लगायत १२ परिवार विस्थापितको खतरा रहेको भन्दै स्थानीयले शनिबार जनप्रतिनिधिलाई ध्यानार्कषण गराएका छन् ।
सडक विस्तारले शिशु कल्याण मावि नै जोखिममा परेको भन्दै लगातारको बर्षाले कुनैपनि बेला असर गर्नेतर्फ वडा अध्यक्ष भुपेन्द्र बहादुर खत्रीको समेत ध्यानार्कषण गराइएको स्थानीयको भनाई छ । ‘वडा अध्यक्ष गाउँमै हुनुहुन्छ,‘हामी विकास विरोधी होईनौ, गाउँ नै विस्तापित गर्ने अवस्थामा चुप लागेर बस्न सक्दैनौ’ प्रेम बहादुर रोकाले भने । भिरालो जमिनमा बस्तीमाथिबाट डोजरले सडक खनिएकाले पनि जमिन हल्लिएर पानी पर्नासाथ पहिरो खस्न थालेको उनको भनाइ छ । 
करिब ८० लाख लागत अनुमान गरिएको सडक विस्तारको क्रममा कडा चट्टान पन्छाउनुपर्ने भएकाले समेत तत्काल ब्यवस्थापन नगरे अर्मन गाउँका करिब ५० घरधुरी बाढीपहिरोको जोखिममा बस्नुपर्ने स्थानीयको भनाई छ । स्थानीयले भौगोलिक र वातावरणीय मूल्यांकनबिना नै धमाधम बस्तीमाथिबाट सडक निर्माण गरेको आरोप लगाएका छन् ।
‘सानो पानी आउँदा पनि पहिरो खस्न थालेको छ,‘बर्खाको समयमा रातभर जागराम बस्नुपर्छ’ धनमायाँ सुबेदी गौतमले भनिन्। डोजरले खनिएको कच्ची सडकमा स्थानीयले तत्काल रोक्नुपर्ने माग गरेका छन् । गाउँमाथिबाट ठूला ढुंगा खस्ने थालेको अवस्थामा बस्तीलाई सुरक्षित बनाउन ढुंगा फुटाउन समेत स्थानीयले माग गरेका छन् । यता वडाअध्यक्ष खत्रीले निर्माणको कामलाई ब्यवस्थित अगाडि बनाउने आश्वासन दिएका छन् ।
