म्याग्दी बहुमुखी क्याम्पसको आयोजनामा रघुगंगा गाउँपालिका-२ भगवतीमा उच्च रक्तचाप दिवसको अवसरमा नसर्ने रोग सम्वन्धी एक दिने सचेतना कार्यक्रम सञ्चालन गरिएको छ । समुदायमा आधारित शिक्षा अन्तरगत क्याम्पसले प्रदेश जनस्वास्थ्य कार्यालय बेनी म्याग्दीको आर्थिक एवम् प्राविधिक सहयोगमा सञ्चालित कार्यक्रमको वडा अध्यक्ष अमृत भण्डारीले उद्घाटन गर्नुभयो ।
प्रदेश जनस्वास्थ्य कार्यालय बेनी म्याग्दीको प्रमुख भुवन ठकुरानीले एक व्यक्तिबाट अर्को व्यक्तिमा नसर्ने, सूक्ष्म जीवाणुबाट नहुने मधुमेह, उच्च रक्तचाप र मिर्गौला रोग) को पहिचानका लागि समुदायस्तरमा सचेतनामुलक अभियान आवश्यक रहेको बताउनुभयो । नसर्ने रोग बढ्नुको प्रमुख जोखिम तत्वहरुमा सुर्तीजन्य पदार्थको प्रयोग, शारीरिक गतिविधिको कमी, मादक पदार्थको सेवन, अस्वस्थकर खानपान र जीवनशैली रहेको बताउनुभयो ।
मुक्तिधाम माविका व्यवस्थापन समितिका अध्यक्ष लक्ष्मीप्रसाद सुवेदी, देवेन्द्र वहादुर मल्ल समाजसेवी, तप्त बहादुर थापा समाजसेवी र चेतनाथ सुवेदी, भगवती आमासमूह, सिर्जनशील आमा समूहका पदाधिकारी तथा सदस्यहरु, मुक्तिधाम मा.वि.का कक्षा १० मा अध्ययरत विद्यार्थीहरु गरी ५६ जनाको उपस्थिति रहेको थियो ।
सहजीकरण जनस्वास्थ्य अधिकृत गणेश सुवेदीले गर्नुभएको थियो । कार्यक्रममा सहायक क्याम्पस प्रमुख नारायणप्रसाद सुवेदीले स्वागत मन्तव्य तथा सञ्चालन म्याग्दी बहुमुखी क्याम्पसका उपप्राध्यापक नाराणय पौडेलले गर्नुभएको थियो ।
