नेपाल सरकारले हुलाकको पुनः संरचना अन्तर्गत ‘एक पालिका, एक स्माट हुलाक’ कार्यालय स्थापना गर्ने नीतिअनुसार म्याग्दीका पाँचवटै पालिकाको केन्द्रमा हुलाक कार्यालय स्थापना भएको छ । हुलाक सेवालाई प्रभावकारी बनाउन गाउँपालिकाकाको केन्द्र बाहिर रहेका हुलाक सेवालाई केन्द्रमा स्थानान्तर गरी सबै पालिकामा हुलाक कार्यालयको स्थापना गरिएको हो ।
विगतमा गाउँपालिका केन्द्रमा हुलाक कार्यालय रहेको मंगला गाउँपालिकाको बावियाचौर, मालिका गाउँपालिकाको दरबाङ बाहेक रघुगंगा गाउँपालिकाको भगबतीबाट पालिकाको केन्द्र मौवाफाँट, अन्नपूर्ण गाउँपालिकाको दानाबाट पालिका केन्द्र पोखरेबगर,धवलागिरी गाउँपालिकाको ताकमबाट मुनामा स्थानान्तर गरिएको कार्यालय प्रमुख रमेश थापाले बताउनुभयो ।
‘पालिकाको केन्द्रबाट हुलाक सेवालाई अझै प्रभावकारी बनाउँछौ, स्रोतसाधनको अभावका बिच पनि सेवालाई प्रविधिमैत्री बनाउन केन्द्रित छौ ।’प्रमुख थापाले भन्नुभयो । पालिकास्तरीय हुलाक कार्यालयमा खरिदारको कमान्डमा कर्मचारी परिचालन गरिएको प्रमुख थापाको भनाई छ ।
सुचना प्रविधिको अत्याधुनिक विकास सँगै हुलाक सेवाको प्रभाविकारिता खुम्चिँदै गएको अवस्थामा सरकारी तथा ब्यक्तिगत चिठीपत्र मात्रै नभई दैनिक प्रयोग हुने आधारभूत कागजात सहित एफ.एम. रेडियो नवीकरण पत्रपत्रिकाको लोक कल्याणकारी विज्ञापनको भुक्तानी, प्रेसपास नवीकरण तथा अनुगमन लगायतका सेवा प्रवाह पनि सोही कार्यालयबाट भइरहेको छ । हुलाक कार्यालयले म्याग्दीबाट मुस्ताङ र जिल्ला बाहिर जाने सेवाका लागि कालिपुल बसपार्कमा हुलाक केन्द्र स्थापना गरेको छ ।
प्रत्येक पालिकामा एउटा हुलाक कार्यालय रहने व्यवस्था भएबमोजिम इलाका हुलाक हटाएपछि हाल म्याग्दीमा एक जिल्ला हुलाक कार्यालय, पालिकास्तरीय हुलाक कार्यालय र २८ अतिरिक्त हुलाक कार्यालय रहेको छ ।
हाल जिल्ला हुलाक सहित पालिकामा प्रमुख सहित ४० दरबन्दी र अतिरिक्त हुलाकमा ५३ जना कर्मचारी रहेको जिल्ला हुलाक कार्यालयकी सूचना अधिकारी सम्झना भण्डारी बानियाँले जानकारी दिनुभयो । हुलाक चिठीपत्र लगायत दस्ताबेज सम्बन्धित व्यक्ति वा संस्थासम्म पुगाउने विश्वसनीय माध्यम भएकाले सूचना प्रविधिको वर्तमान युगमा पनि यसको महत्व कायमै रहेको छ ।
