सरकारले निजी विद्यालयलाई एक महिनाको शुल्क छुट दिन निर्देशन दिएपनि म्याग्दीका कुनै विद्यालयले औपचारिक घोषणा नगरेको अवस्थामा पश्चिम म्याग्दीको एक विद्यालयले विद्यालय खुलेपछिको मात्रै मासिक शुल्क लिने घोषणा गरेको छ ।
मालिका गाउँपालिका–६ दरबाङमा अवस्थित केबी एकेडेमी एण्ड बोर्डिङ स्कुलले कोरोना भाइरसको संक्रमणको जोखिमलाई मध्यनजर गरी बन्द भएको पठनपाठन सुचारु भएको महिना र दिनबाट मात्रै मासिक शुल्क लाग्ने जनाएको छ । ‘अभिभावकलाई शुल्क अवस्था नै होईन्,हामीले जति पढाउँछौ, त्यही शुल्क लिन्छौ’ विद्यालयका प्रबन्ध निर्देशक हिरा पुनले बेनीअनलाइनलाई भन्नुभयो ।
विद्यालयले शुल्क असुल्ने नियत विगतमा समेत नराखेको बताउँदै अभिभावकलाई कोरोना भाइरस र लामखुट्टेको टोकाईबाट सर्ने डेंगुबाट आफुँ र बालबच्चालाई जोगाउन समेत विभिन्न माध्यमबाट जानकारी गराइएको बताउनुभयो ।
सरकारले एक महिनाको आवासबाहेक अरु सबै प्रकारको शुल्क छुट दिनुपर्ने निर्णय गरेपनि म्याग्दीमा औपचारिक रुपमा कुनैपनि निजी विद्यालयले घोषणा गरेका छैनन् । सदरमुकाम बेनीमा रहेका ठूला विद्यालयले छुटको सुविधालाई कार्यान्वयन गर्ने अपेक्षामा अभिभावक रहेका छन् । चैत्र महिनामा बार्षिक परीक्षा लगत्तै बन्द भएको विद्यालय खुल्ने अझै निश्चित छैन् ।
