म्याग्दीको रघुगंगा गाउँपालिका-३,मालिका टोलमा जाने मोटरबाटो तथा गोरेटो बाटो मर्मतमा वडाबाट विनियोजित बजेटले अपुग स्थानीयले श्रमदान गरेका छन् । गाउँसम्म जोड्ने बाटो कच्ची हुदाँ सवारीसाधन आवतजावत गर्न समस्या भएपछि वडा कार्यालयबाट विनियोजित २ लाख बजेटले अपुग भएपछि स्थानीयबासीले लगातार श्रमदान गरी सडक मर्मत गरेको स्थानीय गोपी परियारले बताउनुभयो।
‘कच्ची सडकमा सवारीसाधन आउन मान्दैनन, हामीले समुदायस्तरबाटै श्रमदान समेत गरेर बाटो बनाएका छौ, अब थप बजेट समेत मागेर राम्रो बनाउँछौ’ परियारले भने । सडकखण्डमा वडाबाट विनियोजित बजेटले खाल्टाखुल्टी मर्मत तथा मालिकामा २८ मिटर र जुकेपानीमा ५२ मिटर सडक सोलिङ गरिएको छ । जनश्रमदानमा जुटेकालाई स्थानीय वडा सदस्य आइती दर्जी र फुलकुमारी दर्जीले ब्यक्तिगत रुपमा खाजाको ब्यवस्थापन समेत गर्नुभएको थियो ।
उपभोक्ता समितिका अधयक्ष रमेश दर्जीका अनुसार करिब ३० लाख बजेट भएमा सडक स्तरोन्नतिका गर्न सकिने बताउनुभयो । मालिका टोलमा करिब ८० घरधुरी रहेको छ । सडकको स्तरोन्नती गरिएपछि विद्यालयमा जाने बालबालिका तथा गाउँपालिकाको केन्द्र मौवाफाट, भगवती लगायतका क्षेत्रमा आवतजावत र सामान ढुवानी गर्न, कृषि उपज निकासीमा सहज भएको छ।
