म्याग्दी जिल्लाको सदरमुकाम बेनी बजारमा आज सहिद दिवस विशेष कार्यक्रमसहित मनाइएको छ। कार्यक्रमका क्रममा जिल्ला प्रशासन कार्यालय म्याग्दीका प्रमुख, नेपाल प्रहरी म्याग्दीका प्रमुख, स्थानीय जनप्रतिनिधिहरू, समाजसेवी तथा नागरिक समाजका व्यक्तित्वहरूको उपस्थिति रहेको थियो।
सहिद दिवसको अवसरमा दीप प्रज्वलन गरी सहिदहरूको सम्मान गरिएको थियो। सहभागीहरूले सहिदहरूको बलिदानको सम्झनामा मौन धारण गर्दै देश र जनताको हितका लागि उनीहरूले पुर्याएको योगदानको कदर गरेका थिए।
कार्यक्रममा बोल्दै प्रमुख जिल्ला अधिकारी गुरुदत्ता ढकालले सहिदहरूले देखाएको मार्गमा हिँड्दै समृद्धि र समानताको नेपाल निर्माण गर्न सबैले आफ्नो क्षेत्रबाट योगदान गर्नुपर्ने उल्लेख गरे। त्यस्तै, नेपाल प्रहरी म्याग्दीका प्रमुख भरत श्रेष्ठले! शान्ति, सुरक्षाका लागि सहिदहरूको योगदान अतुलनीय रहेको बताउँदै उनीहरूको आदर्शलाई पछ्याउँदै अघि बढ्नुपर्नेमा जोड दिए।
स्थानीय सामाजिक संघसंस्थाहरूको सहभागिता रहेको उक्त कार्यक्रममा सहिदहरूको योगदानबारे विचार विमर्श गर्दै उनीहरूको सपना पूरा गर्न सबैले एकताबद्ध भएर काम गर्नुपर्ने सन्देश दिइएको थियो।
सहिदहरूको सम्झनामा आयोजित यस कार्यक्रममा स्थानीय बासिन्दा, विद्यार्थी तथा विभिन्न पेशाकर्मीहरू समेतको उल्लेखनीय उपस्थिति रहेको थियो।
