म्याग्दीको बेनी नगरपालिका–५,पछैमा निर्माणधिन अवस्थामा रहेको रावण पार्क (उद्यान) परिसरमा राखिने रावणको ६ मिटर अग्लो मूर्तिको खुट्टा पार्कभित्र त्रिपालले छोपेर राखिएको छ । बेनी नगरपालिकाको गौरवको परियोजनामा रावणको मुर्ती राख्ने विषयमा असहमति जनाउदैं हाल भारतमा बस्ने पर्वतका केदारनाथ दासले सर्वोच्चमा रिट दायर गरेपछि मुर्तीको शरीर र अनुहार ढुवानी रोकिएको छ ।
२०७७ सालमा सुरु भएको परियोजना अन्तरगत मुल मन्दिरभन्दा पर रावणको मुर्ती सहितको पार्क निर्माण गरेपनि कानुनी झन्झटमा फसेपछि अहिले महत्वपुर्ण काममा आएर रोकिएको छ । सर्वोच्च अदालतले रावण पार्क र प्रतिमा नराख्न दिएको अन्तरिक आदेश बिरुद्ध बेनी नगरपालिकाले पौराणिक तथ्य सहित अन्तरिम आदेश पुनरवलोकन (भ्याकेट) को निवेदनको तयारी सहित बहसका लागि एक टोलीले स्थलगत अनुगमन समेत गरेको छ ।
वडा अध्यक्ष गोविन्द बानियाँले मन्दिर बाहिरको पार्कमा राखिने रावणको मुर्तीको तथ्य र प्रमाणहरु रहेको बताउँदै ३ ऋषिहरू पुलह, पुलस्त्य र विश्रवाको पहिचान समेत गुम्न नदिने बताउनुभयो । पार्कमा रावणको ६ मिटर अग्लो मूर्तिसमेत बनाइने, पुलहाश्रममा रहेका ऋषिमुनि मन्दिर, हवन कुण्डलगायतका संरचनालाई संरक्षण गरी पार्क बनाउने योजनालाई सहज रुपमा सम्पन्नको वातावरण बनाउन समेत वडा अध्यक्ष बानियाँको अनुरोध छ । हालको मन्दिर, हवन कुण्ड, रावणको नाबी गाडेको ठाउँलाई यथावत राखिने छ ।
बेनी नगरपालिकाले रावण पार्कमार्फत दक्षिण भारत, भुटान र श्रींलका सहित विश्वभरका हिन्दु धार्मिक पर्यटकलाई भित्राउने तथा स्वदेशी पर्यटकलाई समेत आर्कषित गर्ने गरी विभिन्न योजना बनाएको छ । पार्क सहजै सम्पन्न भएमा निजी क्षेत्रबाट समेत रिर्सोटदेखि विभिन्न परियोजनाका बारेमा बेनी नगरपालिकासँग प्रस्तावमा छलफल भइरहेको छ ।
बेनी नगरका मेयर सुरत केसीले मुक्तिनाथ प्रवेशद्वार गलेश्वर, पुलाचौरको पछै, जगन्नाथ र टोड्के क्षेत्रलाई समेटेर धार्मिक कोरिडोर बनाउने योजनमा जुटेको अवस्थामा धार्मिक तथा सरोकारवाला निकायबाट सहयोग आवश्यक रहेको बताउनुभयो । उहाँले बेनीलाई धार्मिक पर्यटनको हब बनाउने अभियानमा रावण पार्क महत्वपुर्ण हिस्सा रहेकाले तथ्य र प्रमाण सहित सर्वोच्चबाट न्याय पाउने बताउनुभयो ।
एतिहाँसिक दस्तावेजमा श्रीमद्भागवत महापुराणको सप्तम स्कन्दको अध्याय १४ को दण्डकका अनुसार पुलस्त्य पुलहाश्रम क्षेत्र विश्वका अति पवित्र १५ तीर्थस्थलमध्ये मानिने, पुराणप्रसिद्ध ३ ऋषिहरू पुलह, पुलस्त्य र विश्रवा तथा विश्रवा ऋषिको छोरा रावणको जन्म पुलस्त्य आश्रममा नै भएको बहसमा प्रस्तुत गर्ने जनाइएको छ । त्यस्तै पुलह र पौलस्त ऋषिले यहाँ तपस्या गरेर हवन (यज्ञ) गर्न लाग्दा पानी पर्न थालेको, ओढारभित्र यज्ञका अवशेष चरु भेटिनुले पनि यो ठाउँको महत्व उजागर भएको मानिन्छ ।
