‘अब म पनि खेल्छु’ भन्ने मुल नाराका साथ अस्टेलियामा महिला तथा पुरुष भलिबल र पुरुष बास्केटबल प्रतियोगिता सकिएको छ । प्रवासमा रहेका म्याग्देलीसहित नेपाली समाजमा सद्भावलाई कायम राख्नका लागि खेलाडी, खेल र खेलप्रेमीलाई प्रोत्साहन गर्ने उद्देश्यले प्रतियोगिता आयोजना गरिएको हो । मोना वान–डे टुर्नामेन्ट अन्तर्गत मोना अस्टेलियाद्वारा आयोजित पुरुष भलिबलतर्फ कुल १३ टिम सहभागी भएकोमा छन्त्याल परिवार अस्टेलिया (सिपिए) प्रथम र मोना अस्टेलिया दोस्रो भएका छन् ।
यसैगरी महिला भलिबलतर्फ कुल ५ टिमले सहभागिता जनाएकोमा ढोरपाटन क्लब पहिलो र पोखरा क्लब दोस्रो भएका छन्। १० टिम सहभागी पुरुष बास्केटबलमा वाइल्ड याक्स विजेता बनेको जनाइएको छ ।अस्टेलियामै सबैभन्दा ठूलो नेपाली समाजद्वारा आयोजित खेलकुद प्रतियोगिताको अवसरमा राष्ट्रिय खेलाडी टेकराज अवस्थीलाई सम्मान गरिएको थियो ।
प्रतियोगितामा एनआरएनए अस्टेलियाका प्रेसिडेन्ट अनिल पोख्रेलको प्रमुख आतिथ्य रहेको थियो भने झण्डै १ हजारबढी दर्शकहरुले खेल अवलोकन गरेको मोना अस्टेलियाका प्रवक्ता हिक्मत श्रेष्ठले जानकारी दिनुभयो । प्रतियोगिता अस्टेलियाको सिड्नीस्थित अवर्नमा आयोजना गरिएको थियो ।
रोजगारको सिलसिलामा अस्टेलिया पुगेका प्रवासीहरु आबद्ध मोना अस्टेलियाले जिल्ला र अस्टेलियामै पनि धेरै सामाजिक कार्यहरु गर्दै आइरहेको छ । मोना अस्टेलिया, अस्टेलियामा हुने हरेक खालका सामाजिक गतिविधिहरुमा सक्रियताका साथ पहिलो स्थानमा रहेको संस्थाले जनाएको छ । अध्ययनका लागि शैक्षिक परामर्शदाताको पहिचान बनाएको स्टूडेण्ट भाइब्सले अस्ट्रेलियाको ताइटल स्पोन्सरमा उक्त टुर्नामेन्ट भएको हो ।
