म्याग्दीको रघुगंगा गाउँपालिका–१ बेगखोलाकी ललिता शेर्बुजा ‘मिस नेपाल २०२४’ नेपालको उत्कृष्ट २६ प्रवेश गर्नुभएको छ। द हिडन ट्रेजरको आयोजनामा भएको अडिसन राउण्डबाट छनौट भएर प्रतिस्पर्धाको चरणमा प्रवेश गर्नुभएकी शेर्बुजाले म्याग्दी जिल्लाको कला, संस्कृति, भेषभुषा, रहनसहनको संरक्षण र प्रर्बधनका साथै जिल्लाको सुन्दरताको समेत मिन नेपालमार्फत प्रचारप्रसार गर्ने बताउनुभयो ।
Adv
‘जन्मभूमीलाई चिनाउने एउटा अवसरको रुपमा लिएको छु, मैले यो मौकामा म्याग्दीको मौलिकतालाई झल्कने गरी प्रस्तुती दिनेछु’ शेर्बुजाले बेनीअनलाइनलाई भन्नुभयो । यसभन्दा अगाडीका चरणहरुमा समेत म्याग्दीको पहिचानसँग जोडिएका विषयबस्तुलाई नै चर्चा गरेको शेर्बुजाको भनाई छ ।
मिस नेपालको प्रतियोगितामा मौलिक कला र संस्कृति माथिको भइरहेको अतिक्रमणका बारेमा समेत ध्यानार्कषण गराउने बताउनुभयो । मौलिक भाषा, कला, संस्कार र संस्कृति जोगाउन अहिलेको पुस्ताको पहिलो जिम्मेबारी रहेको समेत शेर्बुजाको भनाई छ ।
भावी पुस्तालाई हस्तान्तरण गर्न नसके लोभ हुने भएकाले आफ्नो मिस नेपालको यात्राको प्रमुख उदेश्य नै मौलिकता झल्किने गरी प्रस्तुती दिने शेर्बुजाले बताउनुभयो ।
Adv
मिस नेपालको प्रतियोगिताबाटै मिस नेपाल वर्ल्ड, मिस नेपाल अर्थ र मिस नेपाल इन्टरनेसनल विधामा प्रतिस्पर्धा हुनेछ । ग्राण्ड फिनाले साउन १९ गते ललितपुरको गोदावरीस्थित सनराइज कन्भेन्सन सेन्टरमा आयोजना हुने जनाइएको छ । यसैबीच मिस नेपालमा बेगखोलाकी चेलीले प्रतिस्पर्धा गरेको भन्दै बेगखोलाबासी उत्साहित भएका छन् ।
