रोजगारको सिलसिलामा यूरोपेली मुलुक फ्रान्स पुगेका महिला भलिबल खेलाडी संगठित हुन थालेका छन् । म्याग्दीबाट फ्रान्समा पु्गेका महिला भलिबल खेलाडीलाई म्याग्दी प्रवासी नेपाली संघ मोना फ्रान्सले संगठित गरी महिला टिम बनाएको छ ।
हालै गैर आवासीय नेपाली संघ राष्ट्रिय समन्वय परिषद, फ्रान्सको ‘एन.आर.एन स्पोर्टस डे’को भलिबल प्रतियोगितामा पहिलोपटक समुह बनाएर मौतिपूर्ण भलिबलमा सहभागि मोना फ्रान्स महिला टोलीले उपाधी समेत जितेको थियो ।
यूरोपका विभिन्न देशबाट फ्रान्समा पुगेका महिला भलिबल खेलाडीको सेट टिम बनाएर आगामी दिनमा हुने प्रतियोगितामा सहभागि बनाउने मोना फ्रान्सका अध्यक्ष देबेन्द्र केसीले बताए ।
‘भलिबलका अनुभवी खेलाडीहरु पाएका छौ, अब संस्थागत विकाससँगै उहाँहरुलाई खेलमा समेत जोड्छौ’ अध्यक्ष केसीले भने । पुरुषको शसक्त टिम भएकाले फ्रान्समा हुने नेपाली संघसंस्थाका प्रतियोगितामा उपाधी जित्ने गरेकोमा अब महिला टिमले समेत भलिबलमा बर्चस्व कायम गर्ने दावी गरे । मोनाले फ्रान्समा रहेका म्याग्देली भलिबल खेलाडीलाई सम्पर्कमा आउन समेत अनुरोध गरेको छ।
मोना फ्रान्सको महिला भलिबल टिममा सुस्मा शेरपुञ्जा, टकमाया सेन्चुरी, भिमा बुढा मगर, खिमा पाइजा, चन्द्र केसी कार्की, शोभा गुरुङ, आयुश्मा राना, सुनिता बोहोरा शाही छिन् । यसपटक मोनाले पुरुष र महिलामा एन.आर.एन स्पोर्टस डे’मा उपाधी जितेको थियो ।
पहिलोपटक महिलाको सहभागिता भएकाले आगामी बर्ष महिलालाई समेत आर्कषक पुरस्कारको ब्यवस्था गरिने एनआरएन फ्रान्सका खेलकुद संयोजक महेन्द्र बोहोराले बताए । उनले महिला टिमको सहभागिताले भलिबल खेलमा थप रौनकता छाएको बताए । यसैबीच मोना फ्रान्सले समेत निकट भविस्यमा भलिबल प्रतियोगिताको आयोजना गर्ने तयारी गरेको छ ।
