न्यायालयको सेवालाई निष्पक्ष र भूमिकालाई तटस्थ बनाउन सकेमा नागरिकको विश्वास बढ्ने म्याग्दीको सदरमुकाम बेनीमा आयोजित एक कार्यक्रमका बक्ताले बताएका छन् । कानुन दिवस –२०८१ को अवसरमा बुधबार बेनीमा आयोजित शुभकामना आदानप्रदान कार्यक्रम कानुन सबै नागरिकको पहुँचमा हुनुपर्ने बताइएको थियो ।
जिल्ला अदालत म्याग्दी र नेपाल बार एसोशियसनको म्याग्दी अदालत इकाईको आयोजनामा अदालत परिसरमा शुभकामना आदानप्रदान कार्यक्रम गरिएको हो । कार्यक्रममा जिल्ला समन्वय समिति म्याग्दीका प्रमुख राजकुमार थापाले न्यायालयको गरिमा र नागरिकको विश्वासलाई थप सुदृढ बनाउन आवश्यक रहेको बताए ।
जिल्ला न्यायाधिश प्रकाशप्रसाद पण्डितले कानुनको परिधीभित्र रहेर न्याय सम्पादन गर्नेसँगै नागरिकको संवैधानिक अधिकार स्थापित गर्न अदालतको योगदान रहेकोमा जोड दिए । जिल्ला सरकारी वकिल कार्यालयका प्रमुख खेमराज पाठक, नेपाल बार एशोसियन म्याग्दीका अध्यक्ष सागरजिवी उपाध्यायले मन्तब्य राखेका थिए ।
बेनी नगरपालिकाका उपप्रमुख ज्योती लामिछाने, प्रमुख जिल्ला अधिकारी लक्ष्मण ढकाल, प्रहरी नायव उपरिक्षक भरत श्रेष्ठ लगायतको उपस्थिति रहेको कार्यक्रमको सञ्चालन जिल्ला अदालत म्याग्दीका श्रेष्तेदार भोलाराज रेग्मीले गर्नुभएको थियो । नेपालमा प्रधान न्यायालय स्थापना भएको दिनलाई कानुन दिवसका रूपमा मनाउने गरिन्छ ।
नेपालमा प्रधान न्यायालय ऐन, २००८ बने पनि त्यसको लागू भने विसं २००९ वैशाख २६ गतेबाट लागू भएको थियो । सोही दिनको सम्झनामा प्रत्येक वर्ष वैशाख २६ गतेको दिनलाई कानुन दिवसका रूपमा मनाउने गरिएको छ ।यायपालिकाको स्वतन्त्रता, विधिको शासन तथा आधुनिक न्याय प्रणालीको स्थापनाका लागि उक्त ऐनले खडा गरेको जगलाई थप मजबुत बनाउन विभिन्न कार्यक्रम गरी यो दिवस मनाउने गरिन्छ ।
