नेपाल विद्युत प्राधिकरणको निर्माणधिन अवस्थामा रहेको रघुगंगा हाइड्रो लिमिटेडले ४० मेगावाटले पवित्र कालीगण्डकी नदी किनारको घाटमा आवतजावत गर्ने स्थानमा संरचना र फोहोर फाल्दा मृत्युपछि दाहसंस्कारमा समस्या भएको छ । जलविद्युतको विद्युतगृह रहेको रघुगंगा गाउँपालिका–३, तिल्किनी उपल्लो आर्यघाट आसपासका क्षेत्रमा ढुङ्गा तथा माटो फाल्दा दाहसंस्कारका लागि आवतजावतमा समस्या भएको गाउँपालिकाका अध्यक्ष भवबहादुर भण्डारीले बताए ।
‘घाट जोगाउन पटक–पटक ताकेता गरिएको छ, अव सहमति अनुसार काम गर्ने प्रतिबद्धता आएको छ’अध्यक्ष भण्डारीले भने । उनले उक्त क्षेत्रका नागरिकको सदियौंदेखि दाहसंस्कार गर्ने घाट आसपासमा गरिएको फोहोर र अवरोध पन्छाउन ठेकेदारलाई अनुरोध गर्दा अटेर गरेपछि निरन्तरको दबाबपछि अहिले अवरोध पन्छाउन प्रतिबद्धता जनाएको बताए ।
केहीदिन अगाडी गाउँपालिकामा भएको सर्वपक्षिय छलफलमा जलविद्युत आयोजनाका प्रतिनिधिले विद्युतगृह रहेको तिल्किनी उपल्लो आर्यघाटमा जमिनको लम्बाई तथा चौडाई अनुसार प्रतिक्षालय निर्माण गर्ने र आर्यघाट परिसरमा आयोजनाले राखेको ढुङ्गा तथा माटो आर्यघाट परिसरबाट खाली गर्ने लिखित प्रतिबद्धता जनाएको थियो । म्याग्दी र कालिगण्डकी नदीमा लुकीछिपी र अवैध रूपमा उत्खनन गर्दा दाहसंस्कार गर्ने घाट, बस्ती आसपासमा समेत असर गरेको छ ।
