पर्वतको जलजला गाउँपालिका–२,मल्लाजमा दहमा हत्या गरिएका एक दम्पत्तीका आफन्त घटनामा संलग्नको पहिचान गरी कानुनी कारवाहीको दायरमा ल्याएको भन्दै पर्वतका प्रहरीलाई धन्यवाद सहित खादा ओडाएर आभार प्रकट गरेका छन् ।
सिंगो नेपाली समाजलाई नै स्तब्ध बनाउने घटनामा संलग्न कृष्णबहादुर विश्वकर्मा र दिपक दर्जीलाई घटनाको एक महिना नवित्दै पक्राउ गरेको र अनुसन्धानको क्रममा प्रहरीबाट भएको सहयोगलाई सम्मान गरेको मृतकका आफन्त भरत थापाले बताउनुभयो ।
‘पेशागत जिम्मेबारी भएपनि हामीले अपराधी खोज्न उहाँहरुबाट भएको मेहनतलाई सम्मान गरेका हौ,‘प्रहरीलाई समुदायको सहयोगले अपराधी समात्न सकिन्छ भन्ने सन्देश दिन आवश्यक थियो’ थापाले भन्नुभयो । मृतकका आफन्तले पर्वत प्रहरीले अभियुक्तलाई सार्वजनिक गरेपछि प्रहरी नायव उपरीक्षक खुमलाल भुषाल, प्रहरी निरिक्षक केशक केसी,केन्द्रिय अनुसन्धान ब्यूरोका होविन्द्र बोगटी,गण्डकी प्रदेश प्रहरी कार्यालयबाट बिषेयज्ञ चिकित्सकलाई समेत धन्यवाद दिएका छन् ।
सोही अवसरमा घटनापछि अनुसन्धानमा समुदायको सहयोग अविस्मरणीय भएको प्रनाउ भु्षालले बताउनुभयो । उहाँले अनुसन्धानमा करिब २ हजार जनासँग सोधपुछ गरिएको र जलजला, बेनीबजार, पर्वत र बागलुङ क्षेत्रमा समेत मागेको सूचना र प्रमाण सहजै पाएको प्रनाउ भुषालको भनाई थियो ।
जलजला–२ का वडाध्यक्ष प्रकाशबहादुर जिसीले घटनाका अपराधी पत्ता नलागेको भए समुदाय नै त्रासले विस्थापित हुने जोखिम रहेको अवस्थामा अपराधीको पहिचान भएपछि समुदाय समेत त्रास मुक्त भएको बताउनुभएको थियो । वडा अध्यक्ष जिसीले आगामी दिनमा यस्ुता घटना हुन नदिन समाजमा अराजक तत्वको पहिचान आवश्यक सम्भावित घटना हुन नदिन समुदायको भूमिका महत्वपूर्ण हुने बताउनुभयो ।
