नेपाल लघुवित्त बैंकर्स संघ जिल्ला समन्वय समितिले अन्तर्राष्ट्रिय श्रमिक दिवस अर्थात् ‘मे डे’ को अवसरमा म्याग्दीको सदरमुकाम बेनीबजारमा सचेतनामुलक कार्यक्रम गरी मनाएको छ ।
‘मर्यादित काम, श्रमिकको सम्मानः हाम्रो अभियान’ नाराका साथ एक सय ३५ औँ विश्व मजदुर दिवसको अवसरमा आयोजित कार्यक्रममा लघुवित्त बैंकर्स संघले बाजागाजा सहित बेनीबजार परिक्रममा गरी सम्पूर्ण मजदुरको सम्मान र पेशागत जिम्मेबारी पूरा गर्नुपर्नेमा जोड दिइएको थियो ।
दिवसको अवसरमा बिरेन्द्रचोकमा आयोजित कार्यक्रममा नेपालमा मजदुर माथि हुने दमन तथा मजदुरका समस्या, हरेक क्षेत्रमा मजदुरको भूमिकाका बारेमा कार्यक्रम संयोजक अजय कोइरालाले आफ्नो भनाई राख्नुभएको थियो ।
दिवसको अवसरमा लघुवित्त क्षेत्रमा सम्भावना, आवश्यकता, चुनौती तथा कर्मचारीमाथि भइरहेको भौतिक आक्रमण, घाईते तथा पेशामै कार्यरत रहुदाँ ज्यान गुमाउनुपरेका ज्ञातअज्ञात मजदुरको समेत सम्झना गरिएको थियो । कार्यक्रमको अध्यक्षता संघका अध्यक्ष टिकाराम रिजाल र सञ्चालन सचिव अमृत सुर्खालीले गर्नुभएको थियो ।
