म्याग्दीको ग्रामिण क्षेत्रमा म्याद नाघेका खाद्यान्न तथा पेयपदार्थ बिक्रीका लागि पठाउने गरेको पाइएको छ । सदरमुकाम बेनी तथा बाहिरी जिल्लाबाट आउने ब्यापारीले सामानको म्याद सकिन लागेको अवस्थामा ग्रामिण क्षेत्रमा पठाउने गरेको अनुगमनको क्रममा भेटिएको छ ।
म्याग्दीको अन्नपूर्ण गाउँपालिकाका ग्रामीण भेगमा उपभोगको म्याद नाघेका खाद्य तथा पेय पदार्थ बिक्री भएको भेटिएपछि तिनलाई जफत गरिएको छ। सोमबार अन्नपूर्ण–६ घार र खिवाङ क्षेत्रका पसलहरुमा गरिएको अनुगमनको क्रममा म्याद नाघेका सामान बिक्री भएको पाइएपछि ती जफत गरिएको हो।
गाउँपालिकाका उपाध्यक्ष एवं उपभोक्ता हित संरक्षण समितिका संयोजक दिवा कुमारी तिलिजा पुनको नेतृत्वमा गाउँपालिकाका कर्मचारी, पर्यटन तथा उद्योग कार्यालय, प्रहरी, उद्योग वाणिज्य सङ्घ अन्नपूर्ण इकाईका प्रतिनिधि, पत्रकारलगायत संलग्न टोलीले घार र खिवाङ क्षेत्रका पसलको अनुगमन गरेको थियो। केही दिन अगाडी मात्रै ग्रामिण क्षेत्रका ब्यापारीले किनेको उपभोग्य बस्तुको समेत म्याद सकिएको अनुगमन टोलीले फेला पारेको छ ।
अनुगमन टोलीले उपभोगको म्याद नाघेका खाने तेल, मैदा, सुजी, मसला, चियापत्ति, चाउचाउ, बिस्कुट, कोक, फेन्टा, स्प्राइट, बियरलगायत रु ७५ हजारभन्दा बढीका खाद्य र पेय पदार्थ जफत गरेको गाउँपालिकाका उपाध्यक्ष पुनले बताइन्।उपाध्यक्ष पुनका अनुसार मूल्यअभिवृद्धि कर ९भ्याट० र व्यक्तिगत खाता नम्बर (प्यान) नलिइकन व्यवसाय सञ्चालन गरेक तथा अनुमतिबिना मदिरा र सुर्तीजन्य पदार्थको बिक्री गरेकाहरूलाई सचेत गराइएको छ।
