रिलायबल नेपाल लाइफ इन्स्योरेन्स लिमिटेड धौलागिरी एरियाबाट मिलियन डलर राउण्ड टेबल(एमडिआरटी) २०२४ को लागि दिइएको लक्ष्य तीन जनाले प्राप्त गर्नुभएको छ । लक्ष्य प्राप्त गर्नु हुनेमा म्याग्दीकी कल्पना बरुवाल, बागलुङका यसिन रोका र जमुना श्रीस थापा रहनुभएको छ । उहाँहरुले रिलायबल नेपाल लाइफ इन्स्योरेन्स लिमिटेडले दिएको प्रथम बिमा शुल्क ४२ लाख माथिको लक्ष्यलाइ हासिल गर्नुभएको धौलागिरी एरिया म्यानेजर देवेन्द्र घिमिरेले जानकारी दिनुभयो ।
जनवरी देखि डिसेम्बरसम्म १२ महिनाको अवधिको बीमा व्यवसायको आधारमा योग्य ठहरिने भएकाले डिसेम्बर अन्तिम सम्ममा भएको व्यवसायको आधारमा सन् २०२४ का लागि मिलियन डलर राउण्ड टेबल(एमडिआरटी) का लागि धौलागिरी एरियाबाट तीन जना योग्य ठहरिएको घिमिरेले बताउनुभयो ।
धौलागिरी एरिया म्यानेजर घिमिरे भन्नुहुन्छ–‘मिलियन डलर राउण्ड टेबल वित्तीय सल्लाहकार प्रायःजसो बीमा अभिकर्ताको अन्तर्राष्ट्रिय संस्था हो, यो संस्थाले आफ्नो सदस्यता वितरणका लागि प्रत्येक वर्ष मुलुक पिच्छेका अभिकर्ताका लागि फरक फरक व्यवसायीक लक्ष्य निर्धारण गर्ने र तोकिएको व्यवसायीक लक्ष्य पुरा गर्ने अभिकर्ताले सदस्यता शुल्क भुक्तानी गरेर आफूले गरेको व्यवसायका आधारमा एक पटकका लागि सदस्यता हात पार्न सक्छन् ।’
सदस्यता नविकरणका लागि पुनः व्यवसायीक लक्ष्य पुरा गरेर योग्यता हासिल गर्नुपर्छ र पुनः सदस्यता शुल्क भुक्तानी गर्नु पर्ने उहाँको भनाई छ ।
विमा अभिकर्ताहरुका लागि उनीहरुले ल्याउने प्रथम बिमा शुल्कको आधारमा एमडिआरटी अन्तर्गत तीन तहको योग्यता क्रम निर्धारण गरिने धौलागिरी एरियाबाट २०२४ का लागि एमडिआरटी हुन सफल यसिन रोकाको भनाई छ । उहाँका अनुसार पहिलो एमडिआरटी, दोश्रो सिओटी र तेश्रो टिओटी गरी तीनवटा तह निर्धारण गरिएको हुन्छ ।
क्यानडाको भ्यानकुभरमा आगामी २०२४ को जुन महिनामा आयोजना गर्न लागिएको एमडिआरटी विश्व सम्मेलनमा सहभागिता लागि पनि एमडिआरटी हुनु आवश्यक रहने एरिया म्यानेजर घिमिरेले बताउनुभयो । उहाँका अनुसार एमडिआरटीले ९९५ अमेरिकी डलर, सिओटीले एक हजार ९५ अमेरिकी डलर र टिओटीले लागि एक हजार एक सय ९५ अमेरिकी डलर दर्ता शुल्कवापत भुक्तानी गर्नुपर्ने हुन्छ ।
क्यानडा पुगेपछि विमा सम्बन्धी र व्यवसाय सम्बन्धमा धेरै कुराहरु सिक्ने मौका पनि मिल्ने हुँदा एमडिआरटी भए पछि उक्त कार्यका लागि सबैले आफ्नो तबरले अग्रसरता देखाउछन् ।
आफ्नै खर्चमा विदेश भ्रमणको अवसरसँगै अन्तर्राष्ट्रिय मञ्चमा सहभागिताको अवसर एमडिआरटीको आकर्षक पक्ष हुने भएकाले पनि आफूले ब्यवसाय गरेर यस्ता फोरममा पुग्न नेपालीहरुका लागि निकै राम्रो कार्य भएको घिमिरेले बताउनुभयो ।
उहाँ भन्नुहुन्छ–‘एमडिआरटी हुने कार्यले अभिकर्ताहरुलाई अन्तर्राष्ट्रियरुपमा सम्बन्ध स्थापित गर्न सघाउनुका साथै सफल वित्तीय सल्लाहकारहरुको अनुभव सुन्ने अवसर पनि दिलाउँछ ।’आइतबार एमडिआरटी एचिभ गरेको खुशीयालीमा कल्पना बरुवाल र सयिन रोकालाइ सम्मान गर्दै बेनी शाखाले केक काटेर खुशीयाली मनाएको थियो ।
