म्याग्दीमा २१ औं अन्तरमावि जेसिज कप फुटबल प्रतियोगिता सुरु भएको छ । मंगलबार उक्त प्रतियोगिताको गण्डकी प्रदेशकी सांसद विमला गौचनले एक कार्यक्रमका विच उद्घाटन गर्नुभयो ।
म्याग्दी जेसीजको मुल आयोजनामा सदरमुकाम बेनीमा मंसिर १९ गतेदेखि २२ गतेसम्म हुने प्रतियोगिता सदरमुकाम बेनी स्थित खुल्ला मञ्चमा संचालन हुने प्रतियोगिताको जेसीज सचिवालयमा आयोजित उद्घाटन कार्यक्रममा बोल्दै प्रमुख अतिथि सांसद गौचनले विद्यालयस्तरको फुटबल प्रतियोगिताबाट म्याग्दीमा फुटबल खेलाडी उत्पादन हुने गरेको बताउनुभयो ।
त्यस्तै बेनी नगरपालिकाका मेयर सुरत केसीले सदरमुकाम बेनीस्थित खेलकुद मैदानलाई आश्वासन दिएपनि संघीय र प्रदेश सरकारबाट बजेट नआउँदा अलपत्र परेको बताउनुभयो । उहाँले माथिल्ला दुई सरकारबाट बजेट आएमा नगरपालिकाले साझेदारीमा खेलमैदानको संरचना पूरा गर्न सकिने बताउनुभयो।
उद्घाटन कार्यक्रममा म्याग्दी उद्योग वाणिज्य संघका बरिष्ठ उपाध्यक्ष सुविन श्रेष्ठ,म्याग्दी जेसीजका संस्थापक अध्यक्ष एवम् बेनपा ७ का वडा अध्यक्ष रमेशकुमार श्रेष्ठ, जिल्ला खेलकुद विकास समितिका अध्यक्ष दिनेश केसीले कक्षा १० सम्मका विद्यार्थी खेलाडीहरुले सहभागीता जनाउने जेसीज कप फुटबल प्रतियोगिताले विद्यालयस्तरमा लुकेर रहेको खेल प्रतिभालाई उजागर गराउन महत्वपूर्ण भूमिका खेल्दै आएको बताउनुभएको थियो ।
जिल्लामा फुटवल खेलाडीहरुको उत्पादन र खेलप्रतिको आकर्षण बढाउन जेसीज कप प्रतियोगिताले महत्वपूर्ण भूमिका खेलेको बताउँदै आगामी बर्ष समेत निरन्तरता दिन कोष सहित थप आर्थिक ब्यवस्थापनमा जोड दिइएको थियो ।
प्रतियोगितामा जिल्लाका विभिन्न २३ विद्यालयले सहभागीता जनाएका छन् ।
म्याग्दी जेसीजले हरेक बर्ष आयोजना गर्ने यस प्रतियोगिताको टाईटल प्रायोजकमा राम–विमला फाउण्डेशन रहेको फुटबल प्रतियोगिताका मुल संयोजक कार्यकारिणी उपाध्यक्ष विनोद घर्तीले बताउनुभयो । प्रतियोगितामा बिजेता विद्यालयलाई रनिङ शिल्ड, ट्रफि, मेडल र प्रमाणपत्र सहित नगद रु ५२ हजार २२२ र उपबिजेतालाई ट्रफि, मेडल र प्रमाणपत्रको साथमा नगद रु ३२ हजार २३२ पुरस्कार प्रदान गरिनेछ ।
प्रतियोगितामा उत्कृष्ट खेलाडि धमानसिंह अवार्ड, सर्वाधिक गालेकर्ता लक्ष्मी पुतली अवार्ड, उत्कृष्ट गालेरक्षक इन्द्र अवार्ड, उत्कृष्ट डिफेन्डर सरस्वती अवार्ड, उत्कृष्ट स्ट्राईकर रामजी अवार्ड, उत्कृष्ट मिडफिल्डर लालिगुराँस अवार्ड, राईजिङ प्लेयर धन अवार्ड, उत्कृष्ट कोच कृष्णप्रसाद एककुमारी अवार्ड, अनुशासित टिम झलक खगेश्वरी अवार्ड नगद रु २ हजार ५ सय र ट्रफिको व्यवस्था गरिएको छ । साथै सेमि फाईनलिष्ट दुई टिमलाई नगद रु ५÷५ हजार र प्रत्येक खेलमा म्यान अफ द म्याचको पुरस्कार पनि प्रदान गरिने छ ।
अन्तर माविस्तरीय फुटबल प्रतियोगिताले विद्यालयस्तरमा लुकेर रहेको खेल प्रतिभालाई उजागर गराउन महत्वपूर्ण भूमिका खेल्दै आएको छ । प्रतियोगिताको सह– प्रायोजकमा मिनबहादुर विश्वकर्मा स्मृति कोष, शैक्षिक प्रायोजक एभरेष्ट ग्लोबल कन्सल्टेन्सी, होटल प्रायोजक होटल डाँफेले गरेको छ ।
कार्यक्रममा रेफ्रिको तर्फबाट निशान गुरुङ र खेलाडीको तर्फबाट प्रकाश माविका टिम क्याप्टेन विनोद तामाङले अनुशासन र मर्यादापूर्वक खेल खेलाउने र खेल्ने सपथ ग्रहण गर्नुभएको थियो। म्याग्दी जेसीजका शाखा अध्यक्ष सुमन बानियाँकोे अध्यक्षता, प्रतियोगिताका मुल संयोजक विनोद घर्ती क्षत्रीको स्वागत र महासचिब कुमार बानियाँको सञ्चालनमा उद्घाटन कार्यक्रम सम्पन्न भएको थियो । 
यसैबीच नेपाल जेसिजको प्रकरण अन्तर्गत केही समय अघि बेनीमा सम्पन्न ‘एउटै परिवार एउटै समुह र एउटै लक्ष’ विषयक निवन्ध लेखन प्रतियोगितामा विजेताहुनेहरुलाई पुरस्कार प्रदान गरिएको थियो । प्रतियोगितामा प्रथम हुने जामुनाखर्क माविका विनिता सुवेदी, द्वितिय हुने न्यू वेष्ट पोइन्ट आवासीय माविका अनुषा रोका र तृतिय हुने लिटल गार्डेन एकेडेमीका सुजता खत्रीलाई नगद सहित प्रमाणपत्रले पुरस्कृति गरिएको थियो ।
