म्याग्दीबाट निर्वाचित जुग्जाली उद्योग, पर्यटन वन तथा वातावरण मन्त्री बन्नुभएको छ । म्याग्दी प्रदेशसभा क्षेत्र (ख)बाट निर्वाचित रेशमबहादुर जुग्जाली (सुविन) लाई मुख्यमन्त्री खगराज अधिकारीले उक्त मन्त्रालयको जिम्मेबारी दिनुभएको हो । ३९ वर्षीय जुग्जाली नेकपा माओवादी केन्द्र म्याग्दीको जिल्ला संयोजक हुनुहुन्छ ।
माओवादीबाट मन्त्रीको जिम्मेबारी पाएपछि सांसद जुग्जालीले आफ्नो कार्यकालमा जिल्लाको विकासमा खास भूमिका निर्वाह गर्ने बताउनुभयो । पश्चिम म्याग्दीको मालिका गाउँपालिका वडा नम्बर ७ बिमका जुग्जाली विद्यालय पढ्दा वि.स. २०५६ मा अनेरास्वीयू क्रान्तिकारीमा संगठित हुनुभएका जुग्जाली २०५७ मा सो संगठनको जिल्ला सदस्य, २०५८ मा जिल्ला सचिव र २०५८ देखि जनयुद्धमा भूमिगत हुनुभएको थियो ।
२०५८ मा एरिया कमिटी सदस्य, २०५९ मा माओवादी जिल्ला सदस्य, २०६१ मा इलाका इञ्चार्ज भएका उहाँ जनमुक्ति सेनामा कम्पनी कमिसार हुदै बटालियन भ्वाईस कमाण्डर बन्नुभएको थियो । माओवादी शान्ति प्रक्रियामा आएपछि २०६३ मा वाइसीएलको जिल्ला सचिव र २०६६ मा माओवादीको तत्कालीन मगँरात राज्य कमिटी सदस्य बन्नुभएको थियो ।
जुग्जाली २०७९ बैशाखमा भएको स्थानीय तह निर्वाचनमा माओवादी केन्द्रबाट मालिका गाउँपालिका अध्यक्षको उमेद्वार बन्नुभएको थियो । मन्त्री जुग्जालीका दाजु जितबहादुर जुग्जालीको वि.स. २०५८ मा सोलुखुम्बुको सल्लेरी आक्रमणका क्रममा सहिद हुनुभएको थियो।
