म्याग्दीको अन्नपूर्ण गाउँपालिका वडा नं ६ खिवाङका यमबहादुर पुर्जाले लेखेको ‘मुल करबाके बाबा र कुलदेवताको दुर ‘ओखा’ साथै विविध पूजा‘ नामक पुस्तक सार्वजनिक भएको छ । पूराना पूजाआज सम्बन्धि विधिहरु विस्तारै लोभ हुन थालेपछि नयाँ पुस्तालाई धर्म र परम्पराबाट विचलित हुन नदिने गरी लेखेकले कुलपुजा सहित विभिन्न पुनमगरले गर्ने विभिन्न पूजाका विधि, प्रक्रिया र पुख्यौलीमा सरस्वती जगाउने विधि लगायत विभिन्न विषयबस्तु समेटिएको छ ।
म्याग्दी र पोखरामा थाईला झाँक्री नामले समेत चिनिने यमबहादुरको पुस्तक पोखरामा एक समारोहका बिच प्रकाशित गरिएको छ । पोखराको लामाचौरमा आयोजित कार्यक्रममा लालीगुराँस पुन मगर समाजका निर्वतमान अध्यक्ष मेघ बहादुर गर्बुजा, सभापति तारा गर्बुजा पुन, लालीगुराँस पुन समाजकी महिला अध्यक्ष राजकुमारी पुन लगायतले पुस्तकको संयुक्त रुपमा विमोचन गर्नुभएको थियो ।
संगीतकार एवम् समाजसेवी बिल पूर्जा मगरद्धारा प्रकाशित पुस्तकले पूनमगर समुदायको धार्मिक विधिलाई समेटेर ५ सय २७ पुष्ठको पुस्तक प्रकाशित गरिएको छ । लेखकले यसअगाडी प्रकाशित पहिलो संस्करणमा छुटेका विविध विषयलाई दोस्रो संस्करणमा समेटेको प्रकाशक पूर्जाले बताउनुभयो । पुस्तक बिमोचन कार्यक्रममा साहरा नौमति बाजा, खिवाङी समाजको पुख्यौली लगायत विभिन्न सांस्कृतिक कार्यक्रम समेत प्रस्तुत गरिएको थियो ।
विधि प्रक्रिया पूरा गरी पूजाआजा गर्नुपर्ने सन्देश सहित नयाँ पुस्तालाई आफ्नो धार्मिक पूजाका प्रकार, विधि र प्रक्रियाका बारेमा जानकारी दिने पुस्तक लोकार्पण समारोहमा सहभागी हुन पाउँदा आनन्दित भएको बक्ताहरुको भनाई थियो । पुस्तकको चर्चाको क्रममा लेखक यमबहादुरलाई पुरानो पुस्ताको धार्मिक विधिको संकलन तथा नयाँ पुस्तालाई उपहार दिने प्रस्तुतिको संज्ञा दिएका थिए । लेखक यमबहादुरले थप नयाँ तथ्य प्राप्त भएमा अर्को प्रस्तुतीमा समेट्ने बताउँदै धेरै विधिहरु यसपटक समेटेको बताउनुभयो ।
