म्याग्दीका बामपन्थी नेता एवम् नागरिक आन्दोलनका अगुवा शिवकुमार श्रेष्ठको आइतवार निधन भएको छ ।अचनाक स्वासप्रवासमा समस्या बढेपछि आइतबार विहान हेलिकप्टरबाट थप उपचारका लागि पोखरा स्थित मणिपाल हस्पिटलमा लगिएकोमा दिउँसो ६७ बर्षिय वर्षको उमेरमा श्रेष्ठको निधन भएको हो ।
श्रेष्ठको फोक्सोमा समस्या देखिएपछि यसअगाडी समेत उपचार गर्नुभएको थियो । शनिबार बेलुकीदेखि अचानक फोक्सोले काम गर्न छोडेको आफन्तको भनाई छ । बेनीको न्यू वेष्ट प्वाइन्ट आवासीय माविका संस्थापक, नेपाल भाषा मंका खल नामक सामाजिक संस्था सहित विभिन्न दर्जन संघसंस्थामा आवद्ध श्रेष्ठ म्याग्दीको कम्यूनिष्ट आन्दोलन, जनआन्दोलन लगायतका सामाजिक कार्यमा सक्रिय हुनुहुन्थ्यो । पछिल्लो समय श्रेष्ठ नेत्र विक्रम चन्द नेतृत्वको नेकपामा आवद्ध रहेर पार्टीका गतिविधिमा समेत संलग्न हुनुहुन्थ्यो ।
बामपन्थी आन्दोलनमा श्रेष्ठको भूमिका अविस्मरणीय रहने भन्दै म्याग्दीका प्रदेश सांसदद्धय सुविन जुग्जाली, हरी भण्डारी सहित विभिन्न संघसंस्थाले दुःख व्यक्त गरेका छन् । स्वर्गीय श्रेष्ठको शब बेनी अस्पतालको शबगृहमा राखिएको छ । जापानमा रहनुभएकी छोरी आएपछि अन्त्येष्टी गरिने पारिवारिक स्रोतले जनाएको छ । श्रेष्ठको श्रीमति, २ छोरा र १ छोरी हुनुहुन्छ ।
