म्याग्दीको अन्नपूर्ण गाउँपालिका-२,भुरुङ तातोपानीका एक मृगौला पीडितलाई नेपाली कांग्रेस अन्नपूर्ण गाउँपालिका वडा नं २ ले उपचारका लागि ३ लाखभन्दा बढी सहयोग गरेको छ । दुवै मृगौला फेल भएपछि पोखरामा उपचारार्थ गोपाल पूर्जाको मृगौला प्रत्यारोपणका लागि ३ लाख २६ हजार ३१५ रुपैयाँ संकलन गरी हस्तान्तरण गरिएको छ । मंगलबार प्रतिनिधिसभाका सदस्य खमबहादुर गर्बुजा र प्रदेशसभाका सदस्य हरि भण्डारीले पीडित पूर्जाकी श्रीमति सुमित्रा पूर्जालाई हस्तान्तरण गर्नुभएको थियो ।
भुरुङ तातोपानीमा पशुपालनमा संलग्न पूर्जाको उपचारको क्रममा दुबै मृगौलामा समस्या देखिएपछि डायलासिस र नियमित औषधीमा सहयोग गर्ने उदेश्यले आर्थिक संकलन गरिएको गोपाल पूर्जा बचाउ अभियानका अमृतमान शेरचनले बताउनुभयो। सहयोग हस्तान्तरण कार्यक्रममा प्रतिनिधिसभा सदस्य गर्बुजाले विपिन्नको उपचारमा सहज हुने आफ्नो तर्फबाट सक्दो सहयोग हुने प्रतिबद्धता जनाउनुभएको थियो ।
मृगौला प्रत्यारोपणका लागि नेपालमा अझै कानुनी झन्झटका कारण पूर्जा भारतमा प्रत्याारोपणका लागि जाने तयारीमा रहेको गोपाल पूर्जा बचाउ अभियानले जनाएको छ । यसैबीच प्रत्यारोपण सहित अन्य विभिन्न खर्च हुने भएकाले सहयोग अभियानमा साथ दिन समेत अपिल गरिएको छ ।
