‘झमझम पर्यो पानी गुर्जा घाटैमा जाडो बढ्यो, सानी, आऊ न काखैमा झमझम पर्यो पानी’ …यो गीत पछिल्लो समय संगीतका पारखीको जिब्रोमा झुण्डिएको छ । टिकटक र युट्युवमा निकै रुचाइएको छ । बिना कुनै तामझाम, सामान्य पोशाक र घुम्न निस्किएको अवस्थामा तयार पारी ‘केटाहरू‘ नाम गरेका युट्युब च्यानलबाट भिडियो रिलिज भएको केही दिन भ्यूज सुस्त थियो ।
म्याग्दीको सदरमुकाम बेनीबजार हुदै पश्चिम म्याग्दीका विभिन्न बस्ती हुदै लुलाङ,,गूर्जाखानी लगायत विभिन्न बस्ती र स्थानलाई समेटिएको गीत गीतसंगीतमा स्थापित कलाकारका साथै विभिन्न क्षेत्रमा आफ्नो फरक पहिचान बनाएकाले समेत गीतमाथि टिकटक बनाएपछि गीत युट्युबको ट्रेन्डिङ २ मा आयो । एक्कासी चर्चामा आएको यो गीत अहिले पनि टिकटकमा निकै रुचाइएको छ । गीतमा म्याग्दीको सदरमुकाम बेनी, लुलाङ, मरेनी, देउराली, म्याग्दी नदी र गूर्जाखानीको धेरै चर्चा गरिएको छ ।
Video Link- झमझम पर्यो पानी …
धवलागिरी गाउँपालिका–२,लुलाङका जेम्स सिर्पाली र उनका साथी मिलन न्यौपानेको रचनामा तयार गरिएको गीतको म्यूजिक भिडियोको निर्देशन किशोर महर्जनले गरेका छन् भने स्वर प्रसन्न शाहको रहेको छ । चार जना यूवाहरू घुम्न गएको बेलामा भ्लग बनाएजस्तै गरी तयार गरेको म्यूजिक भिडियोले म्याग्दी जिल्लाको लुकेको बस्ती मानिने गूर्जा र दलितको बसोबास रहेको लुलाङलाई चिनाउन सफल भएको छ ।
भौगोलिक रुपमा विकट लुलाङ र गूर्जाको अवस्था, विवशता,बाध्यता।का साथै सम्भावनालाई गीतमार्फत सार्वजनिक गर्ने प्रयास गरेको रचनाकार लुलाङका जेम्स सिर्पालीले बताए । ‘सबै म्याग्दीलाई समेटेर गीत तयार पर्दा लामो हुने भएपछि पश्चिम क्षेत्रलाई मात्रै समेट्ने प्रयास गरियो’ सिर्पालीले भने ।
उनले गीतमा उल्लेख गरिएका क्षेत्र पश्चिम म्याग्दीको गहनाको रुपमा रहेको बताए ।प्रकृतिले अनुपम सुन्दरता र सम्पदा खन्याईदिएको भएपनि लुलाङ र गूर्जाका बसोबास गर्नेले धेरै किसिमका दुख, कष्टको सामना गर्नुपरेको अवस्था रहेको सिर्पालीको भनाई छ ।
‘यो गीतले म्याग्दीलाई चिनाउन सफल भएको छ,‘अब थप तयारीसँगै आउँदैछौ’ उनले भने । उनले गूर्जाघाटबाट जलजला जाने क्रममा ठुलो बर्षा भएपछि गीतको बोल राखिएको बताए । करिब एकसाता म्याग्दीमा बिताएर तयार पारिएको भएपनि बर्षाका कारण मुख्य केही गन्तब्यमा जान असफल भएको निर्देशक महर्जनले भने ‘गीत बलियो भए भिडियो आफैं चल्छ भन्ने सन्देश दिन सफल भएका छौ’ उनले भने ।
पहिलोपटक म्याग्दीको विभिन्न स्थान घुम्दा कहिल्यै क्यामेराको सामना नगरेकाहरू समेत भिडियोमा नाच्न आउँदा उत्साहित भएको बताए । कलिला बालबालिकादेखि पाका सबै उमेर समूहका स्रोता–दर्शकले रुचाइदिएकोमा समुहका सदस्यहरू उत्साहित छन् । गीत चल्नुको अर्को महत्वपूर्ण पाटो त यसमा म्यूजिक भिडियोमा अनावश्यक तयारी गरिएको छैन भने ठाटीको धुरीमा चढेर समेत अभिनय, स्थानीयलाई समेत नाचगानमा जोड्ने समेत रहेको छ ।
सरल शब्द र ओझेलमा परेका स्थान, त्यहाँका मानिसको दैनिकीलाई उतारेका कारण दर्शकले गीतलाई रुचाइदिएको टोलीको ठम्याइ छ । गीतमा शब्दहरुको मिठास बेग्लै सुनिन्छ । जस्तै,’ म्याग्दी खोला बगी आयो गुर्जा खानीबाटजीवनभरि साथ दिन्छु, समाऊ मेरो हात, । मोटरमा घुम्न जानी बेनीको बजार ।’ टोलीको पहिलो गीतलाई सबै उमेर समूहका स्रोता–दर्शकले रुचाइदिएकोमा उत्साहित छन् । यो गीत एक महिना यता युट्युवमा झण्डै २६ लाख ३१ हजारले हेरेका छन् भने सयौंले टिकटकमा रुचाएर अभियन गरेका छन् ।
