५२ बर्षपछि भारतबाट रित्तै फर्किएका एक ब्यक्तिलाई सामाजिक क्षेत्रमा क्रियाशील लायन्स क्लब अफ म्याग्दी दोभानले आर्थिक सहयोग गरेको छ । १७ बर्षको उमेरमा घर छोडेर भारत पुगेका म्याग्दीको मंगला गाउँपालिका वडा नं २ सिमलचौरका दल बहादुर घर्ती क्षत्रीलाई क्लवले सोमबार नगद २० हजार हस्तान्तरण गरेको हो ।
भारतमा रहेका विभिन्न नेपाली संघसंस्थाको सहयोगमा नेपाल फर्किएका जिसीको एउटा आँखा र हातमा समस्या रहेको क्लवकी अध्यक्ष कमला जिसी खत्री जिसीले बताउनुभयो । ‘उहाँको अवस्था दयनीय छ,‘उपचारमा समेत आर्थिक आवश्यक छ’ अध्यक्ष जिसीले भन्नुभयो । घर फर्किएपछि आफन्तको सहयोगमा निर्वाह गरिरहनुभएका बृद्धको उपचारमा थप सहयोग आवश्यकता रहेको क्लवकी अध्यक्ष जिसीको भनाई छ ।
पाँचदशक परिवारको सम्पर्क बाहिर रहेको अवस्थामा घरमा बुबाको निधन भएकाले सहयोग रकमबाट कृया तथा बचेको आर्थिकबाट उपचारमा खर्च गर्ने दलबहादुरले बताउनुभयो । ‘तन्नेरी अवस्थामा गएको थिए, बुढेशकालमा रित्तै फर्किए,‘यो सहयोगबाट खुसी छु’ दलबहादुरले भन्नुभयो । लायन्स क्लवको सचिवालयमा आयोजित कार्यक्रममा घरायसी र भारतमा भोगेको समस्याका बारेमा समेत जानकारी गराउनुभएको थियो ।
सोही अवसरमा खबरा बस्ने मुटुरोगी रोशन परियारलाई ८ हजार, राखुकी मृगौला पीडित सिता भण्डारीलाई ५ हजार सहयोग गरिएको थियो । सहयोग हस्तान्तरण कार्यक्रममा दोभानकी संस्थापक अध्यक्ष अमृतदेवी बानियाँ, लायन्स क्लव अन्तराष्ट्रिय बालबालिका बिभागकी प्रमुख सुनिता केसी, विभाग अधिकारी नविना रावल, क्लवका पूर्व अध्यक्ष सहित नयाँ कार्यसमितिको सहभागिता रहेको थियो । कार्यक्रमको सञ्चालन क्लवकी सचिव विष्णु गुरूङले गर्नुभएको थियो ।
