धौलागिरि हिमाल आरोहणको पहिलो विश्राम स्थल र जैविक विविधता तथा प्राकृतिक सुन्दरताको अनुपम भण्डार हो धौलागिरि बेसक्याम्प । यो म्याग्दीको धौलागिरि गाउँपालिकामा पर्छ ।प्रकृतिले दिएको अनुपम उपहार जस्तो लाग्ने यस क्षेत्र हुँदै धौलागिरि शिखरमा मानव पाइला पुगेको पनि धेरै वर्ष भयो ।
विदेशी पर्यटकहरुको रोजाइमा पर्ने आकर्षक यो स्थल नेपालका सरोकारवालाहरुको प्राथमिकतामा भने कहिल्यै पर्न सकेन। सुनको सिरानी हालेर नुनको खोजीमा भौतारिने धौलागिरि बेसक्याप तलका कैयौं गाउँका हजारौं युवाहरु खाडी मुलुक र युरोप,अमेरिकाका शहरको रमझमलाई आफ्नो गन्तव्य वनाइरहँदा विदेशका प्रकृति पारखीहरु भने यहाँ रमाइरहेका भेटिन्छन् ।
आफ्नै थाँतथलोमा सुनौलो भविष्य देखेका युवाहरु पनि नभएका होइनन् । तर,उनीहरुलाई राज्यले खासै सहयोग भने गरेको छैन । तिनै युवाहरुमध्येका एक युवा हुन् दिवान छन्त्याल । छन्त्यालले सिंगापुर र मलेशियाको रोजगारी र पोखराको पारिवारिक बसाइलाई छोडेर यहाँ ६ सय भेडा पालेका छन् । तिनै भेडाको घुम्तीगोठ लिएर उनी यतिबेला यही भूगोल (धौलागिरि वेस क्याम्प) मा ओडार र पाखोमा छाप्रो हालेर भेडाको हेरालु बनेका छन् ।
जडिबुटीको भण्डार मानिने यो क्षेत्र यार्सागुम्बा,पाँचऔंले,सतुवा लगाएतका बहुमूल्य औषधीहरुलाई आफ्नो गर्भमा लुकाएर जानकार खोजिकर्ताहरुको प्रतिक्षा गरिरहेको छ । चारैतिर हरिया खर्क,वादलले डम्मे डाकेको परिवेश,माथितिर धौलागिरि हिमाल र स्वच्छ र ताजा वतास अनि छङछङ गर्दै झेको झरनाको चिसो पानी यहाँका आकर्षण हुन् । अलिकति जोखिम मोलेर जाने होइन त धौलागिरि बेसक्याम्पमा रमाउन ?
