तारा एयरको विमान दुर्घटना हुँदा मृत्यु भएकाहरुको शव निकाल्ने प्रयास जारी छ। सुरक्षाकर्मीको टोली र स्थानीयको सहयोगमा मृतकको शव संकलन गर्ने प्रयास भइरहेको छ। भीरबाट सबै शव निकालिसकेपछि काठमाडौं पठाउने तयारी भइरहेको छ।
दुर्घटनमा मृत्यु भएका यात्रुका आफन्तलाई काठमाडौं बोलाइएको प्रहरीले जनाएको छ।केही शव भीरमा अड्केकाले डोरीले तानेर निकालिँदै छ। तारा एयरको ९एन- एईटी विमानले हिजो पोखराबाट जोमसोमको उडान लिएको थियो।
निकालिएका अधिकांश शव सग्लै र चिन्न सकिने अवस्थामा रहेका छन्।बिहान ९ बजेर ५५ मिनेटमा पोखरा विमानस्थलबाट उडेको विमान १८ मिनेपछि सम्पर्कविहिन भएको थियो।
सम्पर्कविहीन विमान आज बिहान मात्र मुस्ताङको थासाङ गाउँपालिका–२ सानोस्वाँरेमा दुर्घटनाग्रस्त अवस्थामा भेटिएको हो। विमानमा चालक दलका तीन र १९ यात्रुसहित २२ जना सवार थिए।तारा एयरको विमान दुर्घटना भएको स्थानमा अझै पनि मौसम धुम्म छ। पहाडको चुचुरोमा दुर्घटनास्थल छ भने वरपर हुस्सुले ढाकेको छ।
