पश्चिम म्याग्दीको मंगला गाउँपालिका-५, चाङ्गामा लगाइएको लागूऔषध अफिम खेती नष्ट गरिएको छ । लागूऔषध अफिमको खेती गरेको भन्ने गोप्य सूचनाको आधारमा अफिम खेतीलाई नष्ट गरिएको जिल्ला प्रहरी कार्यालय म्याग्दीले जनाएको छ ।
इलाका प्रहरी कार्यालय दरबाङबाट खटिएर गएको म्यादी प्रहरीसहित २८ जनाको टोलीले लागूऔषध अफिम खेतीलाई नष्ट गरेको प्रहरी निरिक्षक राजन ढकालले बताउनुभयो । अन्दाजी पाँच रोपनीको क्षेत्रफलमा लगाइएको अफिम खेतीलाई फडाँनी गरेर नष्ट गरिएको छ । सार्वजनिक स्थानमा कसले अफिमको खेती गरेको विषय भने खुल्न बाँकी रहेकाले अनुसन्धान भैरहेको प्रहरीले जनाएको छ ।
प्रहरीको आफ्नै नियमित कार्यक्रम अन्तरगत पश्चिम म्याग्दीको मालिका र मंगलामा लागूऔषध अफिम खेतीको नष्ट अभियानलाई तिब्रता दिएको छ । यसैगरी जिल्लाको अन्य ठाउँमा पनि हुन सक्ने लागूऔषधको खेती तथा कारोबारलाई नियन्त्रण गर्न आवश्यक खोजीकार्य र अनुसन्धान भैरहेको डिसएपी तिलक भारतीले बताउनुभयो । म्याग्दीमा पश्चिम क्षेत्रबाट यसअगाडी प्रहरीले भारी मात्रामा गाँजा सहित लागु औषध समेत बरामत गरेकाले सार्वजनिक र ब्यक्तिगत जग्गामा लगाइएको अफिम सहित चरेसको भण्डार समेत खोजीकार्य गर्ने गरेको छ ।
