नेकपा माओवादी केन्द्रले आसन्न स्थानीय तह निर्वाचनका लागि म्याग्दीको बेनी नगरपालिकाको मेयर र उपमेयरका उमेद्वार सिफारिस गरेको छ । बेनीमा आइतबार बसेको बेनी नगर कमिटिको बैठकले मेयरमा सेरबहादुर केसी र धनलाल जैसी, उपमेयरमा ज्योती लामिछाने पौडेलको नाम प्रदेश कमिटिमा सिफारिस गर्ने निर्णय गरेको हो ।
माओवादीका प्रदेश कमिटि सदस्य बिनोद केसीले मेयरमा दावी गरेका दुई जना र उपमेयरमा पौडेलको एकल नाम सिफारिस गरिएको जानकारी दिनुभयो । बैशाख ३० गते हुन लागेको चुनावमा तालमेलको सैद्धान्तिक सहमति गरेको सत्ता साझेदार पाँच दलीय गठबन्धनको प्रमुख घटक नेपाली काँग्रेसले गत शुक्रबार बेनीको मेयरमा चिरञ्जिवी शर्मालाई उमेद्वार बनाउने निर्णय गरेको थियो ।
माओवादीका बेनी नगर इञ्चार्ज समेत रहेका केसी गठबन्धनभित्र तालमेलको प्रयास भएपनि समय घर्किसकेकाले तालमेल नभएको अवस्थाको पनि आँकलन गरेर उमेद्वार सिफारिस गरिएको बताउनुभयो । मेयरमा सिफारिस भएका केसी माओवादीको बेनी नगर अध्यक्ष र जिल्ला समन्वय समितिका सदस्य हुनुहुन्छ । गत निर्वाचनमा बेनी नगरपालिकामा माओवादीको उमेद्वार भएर जितेका केसी एक्ला हुनुहुन्थ्यो ।
बेनी नगरपालिका–७ शान्तिटोल निवासी केसी राजनीतिका साथै सहकारी लगायत सामाजिक संघ संस्थामा आवद्ध हुनुहुन्छ।माओवादीबाट मेयरका दावेदार बेनपा ३ भकिम्ली निवासी जैसी माओवादीको श्रम तथा वैदेशिक रोजगार विभागको केन्द्रिय सदस्य, नेपाल वैदेशिक रोजगार व्यवसायी संघ र नेपाल केन्द्रिय मह व्यवसायी संघको अध्यक्ष हुनुहुन्छ ।
उपमेयरको उमेद्वारमा सर्वसम्मत सिफारिस हुनुभएकी पौडेल अनेमसंघ क्रान्तिकारीको जिल्ला अध्यक्ष हुनुहुन्छ । उहाँ गत चुनावमा उपमेयरमा झिनो मतान्तरले पराजित हुनुभएको थियो । सहकारी र सामाजिक संघ संस्थामा सक्रीय बेनपा–७ कुरीलाखर्क निवासी पौडेल माओवादीमा युवा र महिला नेताको रुपमा स्थापित हुनुहुन्छ ।
