म्याग्दीको रघुगंगा गाउँपालिका–६ पाखापानीलाई बालश्रममुक्त वडा घोषणा गरिएको छ । बुधवार पाखापानीमा आयोजित समारोहमा स्थानीय जनप्रतिनिधि, शिक्षक, आमा समूह, युवा क्लब लगायत विभिन्न संघ संस्थाका प्रतिनिधिहरुले बालबालिकाहरुलाई कानुन विपरितको बालश्रममा प्रयोग नगर्ने प्रतिबद्धता जनाएर वडालाई बालश्रममुक्त वडा घोषणा गरिएको हो ।
वडाभित्र गरिएको सर्वेक्षणमा कुनैपनि बालबालिकाहरु बालश्रममा प्रयोग नभएको पाइएपछि आगामी दिनमा समेत बालबालिकाहरुलाई कानुन विपरितको श्रममा नलगाउने प्रतिबद्धता सहित वडालाई बालश्रममुक्त भएको घोषणा गरिएको थियो । कार्यक्रममा बालश्रमको जोखिममा रहेका २० जना बालबालिकाहरुलाई झोला, पोशाक र स्टेशनरी लगायतका शैक्षिक सामाग्री वितरण गरिएको थियो । कार्यक्रममा बोल्दै गाउँपालिकाका उपाध्यक्ष कमला तिलिजाले बालश्रम सामाजिक अपराध भएकाले बालबालिकाहरुलाई कानुन विपरितको श्रममा लगाउन नहुने बताउनुभयो ।
कार्यक्रममा वडा अध्यक्ष मनकुमार शेरपुजा, गाउँपालिकाका महिला तथा बालबालिका शाखा प्रमुख सावित्रा सुवेदीले गाउँपालिकाले गरेको सर्वेक्षणको आधारमा बालश्रममा रहेका बालबालिकाहरु नभेटिएको र बालश्रमको जोखिममा रहेका बालबालिकाहरुलाई शैक्षिक सामाग्री र स्टेशनरी लगायतका सामाग्री सहयोग गर्ने गरि बालश्रममुक्त घोषणा अभियान सञ्चालन भएको बताउनुभयो । वडा नम्बर १ बेगखोला, ३ पिप्ले, ४ दग्नाम र ५ झिँ लाई बालश्रमुक्त वडा घोषणा गरिसकिएको छ ।
वडा अध्यक्ष शेरपुजाकाे अध्यक्षता, भिमा पुन मगरको सञ्चालनमा सम्पन्न कार्यक्रममा वडा सदस्य लिल बहादुर पुन, राप्रपाका अध्यक्ष दप्रसाद पाईजा, अमर माविका शिक्षक सरला पौडेल, हरि आधारभुत विद्यालयका प्रअ सन्तु कुमारी पुन, युवा क्लबका प्रतिनिधि उमेश छन्त्याल लगायतले मन्तव्य राख्नुभएको थियो । गाउँपालिकाभित्रका ११ सय घरधुरी पहिचान गरि सर्वेक्षण गर्दा कुनैपनि बालबालिकाहरु बालश्रममा नरहेको तर १५० जना बालबालिका बालश्रमको जोखिममा रहेको पाईएको प्रमुख प्रशासकीय अधिकृत अमृत सुवेदीलेजानकारी दिनुभयो ।
रघुगंगा गाउँपालिकाले बालश्रममुक्त स्थानीय तह घोषणा सम्बन्धि कार्यविधि २०७७ मा भएको व्यवस्था अनुसार, गाउँपालिकालाई बालश्रममुक्त पालिका बनाउने अभियान सञ्चालन गरेको छ । अभियानको क्रममा जोखिममा रहेका बालबालिकाहरुलाई झोला, पोशाक र शैक्षिक सामाग्री सहयोग गर्ने गरिएको छ भने उनीहरुका अभिभावकहरुलाई दिगो रोजगारितर्फ प्रेरित गर्न शिपमुलक तालिम सञ्चालन गर्ने तयारी गरिएको गाउँपालिकाले जनाएको छ ।
