म्याग्दीको रघुगंगा गाउँपालिका-८ दुवाडी गाउँमा बाढीले ६ घरधुरी पूर्णरुपमा विस्थापित भएका छन् । गाउँको रातोपानी क्षेत्रबाट बस्तीमा पसेको बाढीले ६ घरधुरी सहित वडमा बाढीले करिब ३० स्थानीयको खेतीयोग्य जमिनमा असर गरेको छ ।
गत असार २५ गते आएको बाढीले स्थानीय मनबहादुर छन्त्याल, निरबहादुर छन्त्याल, चिविन घर्ती, मंगली विक, भुपिलाल विक लगायतको घरधुरीमा असर गरेको स्थानीय रितुङ माविका शिक्षक यामप्रसाद विश्वकर्माले बताउनुभयो । बाढीले विस्थापितलाई अर्को स्थानमा राखिएको छ भने आलु लगायतका अन्य अन्नबाली पूर्णरुपमा नष्ट भएको छ । 
एक्कासी आएको बाढीले घरमा असर गरेपछि स्थानीयले भागेर ज्यान जोगाएका थिए । विस्थापितलाई राहत तथा पुर्नवासको अभियान सुरु गरिएको वडा अध्यक्ष गमन छन्त्यालले बताउनुभयो । ‘क्षतीको विवरण संकलन भइरहेको छ,‘स्वदेश तथा विदेशमा रहेकालाई आर्थिक अभियानमा साथ दिन अपिल गरेका छौ’ छन्त्यालले भन्नुभयो ।
हरेक बर्ष बाढीले वितण्डा मच्चाउने गरेकाले सुरक्षित आवासको ब्यवस्था गर्न स्थानीयले माग गरेका छन् । गतबर्षको भदौ २७ गते रघुगङ्गा नदीमा आएको बाढीले रितुङ मावि सहित आसपासका क्षेत्रमा ठूलो क्षती पुगेको थियो । बाढीले प्रभावित क्षेत्रमा राहत तथा थप विवरण संकलन गरिने गाउँपालिकाले जनाएको छ । बाढीले सामुदायिक भवन र खेलकुद मैदानमा समेत असर गरेको छ ।
