म्याग्दीको बेनी नगरपालिका-३, भकिम्लीस्थित जयन्ती माविमा भएको अन्तरविद्यालय स्तरीय हाजिरीजवाफ प्रतियोगितामा बेनी सामुदायिक मावि प्रथम भएको छ । विद्यालयको ६५ औं बार्षिकोत्सवको अवसरमा बिहिबार आयोजित प्रतियोगितामा न्यु वेष्ट पोइन्ट आवासीय मावि द्वितीय र आयोजक जयन्ती मावि तृतीय भएका छन् ।
प्रतियोगितामा प्रथम, द्धितिय र तृतियलाई क्रमश १० हजार, ५ हजार र ३ हजार नगद सहित प्रमाणपत्रले सम्मान गरिएको विद्यालयका सहायक प्रअ मनबहादुर पुनले जानकारी दिनुभयो । विब्यस सदस्य खिमकुमारी क्षत्रीको अध्यक्षता र सञ्चालन सहायक प्रअ पुनले गर्नुभएको थियो ।
कार्यक्रमको उद्घाटन गदैं वडा सदस्य एवम् शिक्षक अभिभावक संघका अध्यक्ष रत्न जिसीले विद्यार्थीको व्यक्तित्व तथा नेतृत्व विकासका लागि अतिरिक्त क्रियाकलाप महत्वपूर्ण हुने बताउनुभयो । विद्यालयको बार्षिकोत्सवको अवसरमा शुक्रबार विविध कार्यक्रम गरी मनाइने तय भएको प्रअ भोजबहादुर जिसीले जानकारी दिनुभयो । भकिम्लीको एक मात्रै मावि जयन्ती माविको भौतिक तथा शैक्षिक विकासका लागि स्थानीयबासीको ठूलो योगदान रहेको छ ।
