म्याग्दीमा बषौंदेखि विकास निर्माण अलपत्र पार्ने निर्माण ब्यवसायीलाई चुनौती दिदैं मुस्ताङलाई राष्ट्रिय राजमार्गसँग जोड्ने बेनी-जोमसोम–कोरला सडकखण्डअन्तर्गत बेनी-गलेश्वर खण्डको जिम्मा लिएका निर्माण ब्यवसायीले गतिलो उदाहरण दिएका छन् । गएको वर्ष माघ महिनादेखि सुरु भएको सडक स्तरोन्नतिको काम सकेर कालोपत्रेको काम अगाडि बढाइएको बेनी–जोमसोम–कोरला सडक योजनाले जनाएको छ ।
बेनी-गलेश्वर सडकखण्डमा कालोपत्रे गर्न आजदेखि प्राइम कोट हाल्न सुरु गरिएको आयोजनाका साइड इन्जिनियर अच्युतविसाल पन्तले जानकारी दिनुभयो ।
प्राइम कोट हालेको २४ घण्टापछि ट्याक कोट हालेर गिट्टी हाल्ने र लगत्तै फस्टकोट राखेर मेसिनले पेल्ने उहाँले बताउनुभयो । त्यसपछि सेकेन्ड कोट अलकत्र छरेर मसिनो गिट्टी हालेर पेलेपछि कालोपत्रेको काम सकिनेछ ।
राष्ट्रिय गौरवको कालीगण्डकी करिडोरअन्तर्गत बेनी–जोमसोम–कोरला सडक योजनाले २ किलोमिटर १ सय २ मिटर दुरीको सडक स्तरोन्नति र कालोपत्रे गर्न जय धनञ्जय मंगलादेवी सुवास जेभीसँग १२ करोड ७५ लाख ९४ हजार चारसय २६ रुपैयाँको लागतमा ठेक्का सम्झौता गरेको थियो ।
बेनीदेखि गलेश्वरसम्म ३ किलोमिटर दुरी रहेको यो सडकखण्डले बेनी नगरपालिकाको ६, ८ र ९ नम्बर वडाको भूगोललाई छुने गर्दछ । बेनी–गलेश्वर खण्ड बेनी नगरपालिका हुँदै उत्तरी म्याग्दीको रघुगंगा, अन्नपूर्ण भएर हिमालपारीको जिल्ला मुस्ताङ र प्रसिद्ध मुक्तिनाथ मन्दिरको प्रवेशद्वारको रूपमा रहेको छ ।
निर्माण व्यवसायी सुवासचन्द्र कार्कीले ठेक्का सम्झौता मितिभन्दा अगावै योजना सम्पन्न गर्न काम थालेदेखि नै निर्माणलाई तिव्रता दिएको बताउनुभयो । योजनाको ठेक्का लिने र काम नगर्ने प्रवृत्ति मौलाइरहेका समयमा बेनी गलेश्वर सडक खण्डमा भएको निर्माण कार्यलाई म्याग्दीवासीहरुले प्रशंसा गरेका छन् ।
