आधुनिकीकरणका नाममा मौलिक संस्कृति नै धरापमा पदै गएको छ । मादल, मजुरा, खैजडीका तालमा भट्याउँदै देउसी र भैलो खेल्ने परम्परा हिजोआज म्याग्दीमा बिरलै देखिँदैन। युट्युब, मेमोरीकार्डबाट गीत बजाएर देउसी र भैलो खेल्न थालेपछि मौलिकपना हराउँदै गएको छ ।
विकृति र विसंगतिलाई निरुत्साहित गदैं देउसी र भैलो सिर्जनात्मक शैलीको हुनुपर्छ भन्ने सन्देश सहित म्याग्दीमा पहिलोपटक म्याग्दीको सदरमुकाम बेनीबजारमा ब्रह्माकुमारी राजयोग सेवा केन्द्र बेनीले ईश्वरीय सन्देशमुलक अलौकिक देउसी भैलोको आयोजना गरेको छ ।
धनकी देवी लक्ष्मी र विद्याकी धनी सरस्वतीको वाहन, पहिरन सहित आध्यात्मिक ज्ञानका माध्यमबाट व्यक्ति, परिवार,समाज हुँदै विश्वमा शान्ति कामनाको सन्देश सहितका गीतमा नृत्य प्रस्तुत गरिएको थियो ।ब्रह्माकुमारी राजयोग सेवा केन्द्र बेनीमा निर्माणधिन अवस्थामा रहेको सभाहलको सहयोगार्थ आयोजित देउसीभैलोको अवलोकन गर्नेको भिड थियो ।
तिहारको महत्वका बारेमा जानकारी सहित समुदायमा शान्ति, अमन चयन तथा सकारात्मक सोचका लागि ज्ञान वितरण गर्ने प्रयत्न गरिएको ब्रह्माकुमारी राजयोग सेवा केन्द्र बेनी शाखाकी प्रमुख रिना दिदीले बताइन् ।
‘अर्थ संकलनभन्दा पनि सन्देश प्रवाहका लागि देउसीभैलो खेलेका छौ,‘हामीले मौलिकतामा आधारित भएर भैलो खेल्दा धेरैले चासो देखाउनुभयो’ केन्द्र प्रमुख रिनाले भनिन् ।
देउसीभैलोमा राजयोग शिक्षाले तनावमुक्त जीवनशैली अवलम्बन गर्न सहयोग पु¥याउने,व्यक्तिभित्र रहेको आध्यात्मिक जागृति र सशक्तिकरणद्वारा समाजमा शान्ति, सद्भाव, सहयोग र समृद्धिको स्थितिलाई पुनः स्थापना गर्न सघाउने जस्ता सन्देश भएको गीत र नृत्य प्रस्तुत गरिएको राजयोगिनी रिना दिदीको भनाई छ ।
मौलिकताको जर्गेना तथा कुलतमा फस्दै गएका यूवापुस्तालाई आध्यात्मिक ज्ञानको सन्देश फैलाउनका लागि समेत देउसीभैलो खेलिएको केन्द्रले जनाएको छ ।
म्याग्दी उद्योग वाणिज्य संघका अध्यक्ष बेलबहादुर कटुवालले समाजमा रहेका विभिन्न खालका विकृति र विसङ्गतिको न्यूनीकरणमा समेत राजयोग शिक्षा सहयोगी हुने उनले बताए ।
उनले देउसीभैलो उदेश्यमा केन्द्रित हुनुपर्ने बताए । उनले राजयोग केन्द्रको भवनमा मानवीय र भावनात्मक सहयोगका साथै आर्थिक सहयोगको आवश्यकता रहेको बताए । ब्रह्माकुमारी राजयोग सेवा केन्द्र बेनीले प्रस्तुत गरेको गीतले देउसी र भैलोको मर्म र संस्कृित बोल्छ ।
मौलिकतामा आधारित देउसीभैलो नयाँ सन्ततीलाई बुझाउन र सिकाउन ध्यान नदिए अबका केही बर्षमा मौलिकतामा आधारित देउसीभैलो एकादेशको कथा जस्तो हुने बुढापाकाको भनाई छ ।
बि.स २०६० सालमा बेनीमा स्थापना भएको ब्रह्माकुमारी राजयोग सेवा केन्द्रको शाखाले जिल्लाका विभिन्न स्थानमा पुगेर आध्यात्मिक ज्ञान सहित सकारात्मक सन्देश दिने कार्यहरु गर्ने गरेको छ भने केन्द्रमा नियमित प्रर्वचन सहितका गतिविधि हुने गरेको छ ।
