रोजगारको शिलसिलामा बहराईनमा ज्यान गुमाएका म्याग्दीको रघुगंगा गाउँपालिका–६ पाखापानीका हिराबहादुर पाईजाको परिवारलाई म्याग्दी प्रवासी नेपाली संघ (मोना) ले रु ५० हजार आर्थिक सहयोग गरेको छ । मोनाले स्थापना गरेको आपतकालिन राहतकोषबाट पाइजाको परिवारको राहतका लागि उक्त सहयोग गरिएको हो ।
मंगलवार बेनीमा मोनाका सचिब सुबोध बरुवालले स्वर्गीय पाईजाकी श्रीमती आसमायाँ पाईजा, छोरी एनिसा र छोरा अमितलाई उक्त सहयोग रकम हस्तान्तरण गर्नुभएको थियो । स्वास्थ्यमा समस्या आएपछि गत मंसिरमा ५७ बर्षिय पाईजाको बहराइनमा नै निधन भएको थियो । सामाजिक कार्यमा समेत सक्रिय रहनुभएका पाईजा मोना बहराईनको सल्लाहकार समेत हुनुहुन्थ्यो ।
घरमुलीको प्रवासमै निधन भएको र आम्दानीको स्रोत गुमेपछि घरपरिवारको राहतका लागि मोना अन्तराष्ट्रियको बैठकबाट सहयोग उपलब्ध गराउने निर्णय भए बमोजिम उक्त सहयोग हस्तान्तरण गरिएको सचिब बरुवालले बताउनुभयो । आपतकालिन कोषबाट यस अघि कोरोना महामारीको समयमा जिल्लामा स्वास्थ्य सामाग्री सहयोग र प्रवासमा अलपत्र परेका जिल्लाबासीलाई नेपाल फर्काउने कार्यमा समेत सहयोग गरिएको मोनाले जनाएको छ
