विश्व रेडक्रस दिवसको अवसरमा म्याग्दीमा विविध कार्यक्रमसहित विश्व रेडक्रस दिवस मनाइएको छ । रेडक्रसका संस्थापक जँ हेनरी ड्युनाको १ सय ९२औं जन्म दिवसको अवसर पारी मे ८ तारिखका दिन रेडक्रस जिल्ला शाखा र उपशाखाले विविध कार्यक्रमसहित दिवस मनाएका हुन् ।
विश्व रेडक्रस दिवसको अवसर पारेर नेपाल रेडक्रस सोसाइटी पुलाचौर उपशाखाले ज्येष्ठ रेडक्रसकर्मीलाई सम्मान तथा विपन्न परिवारलाई खाद्यान्न वितरण गरेको जनाएको छ । सामाजिक क्षेत्रमा क्रियाशील संस्था रेडक्रसमा आबद्ध भई लामो समयदेखि सक्रिय रहेर योगदान पु¥याएको भन्दै विशिष्ट सदस्यहरुमध्ये भीरमुनीका सूर्यप्रकाश बानियाँलाई ज्येष्ठ रेडक्रसकर्मीका रुपमा सम्मान गरिएको हो ।
यसैगरी यशस्कर सदस्यहरुतर्फ भीरमुनीकै ज्येष्ठ रेडक्रसकर्मी यामबहादुर बानियाँ र आजीवन सदस्यमध्ये पुलाचौरका ज्येष्ठ रेडक्रसकर्मी यादवप्रसाद पौडेललाई सम्मान गरिएको उपशाखाले जानकारी दिएको छ । सम्मानित तीनैजना व्यक्तित्वहरुलाई दोसल्ला ओढाई सम्मानपत्र प्रदान गरेर सम्मान गरिएको थियो । उनीहरुलाई छुट्टाछुट्टै दुई स्थानमा आयोजित कार्यक्रममा सम्मान गर्दै रेडक्रस म्याग्दी जिल्ला शाखा सभापति लेखबहादुर हमालले विपद्को समयमा रेडक्रस अग्रस्थानमा रहेर काम गर्दै आइरहेको बताए ।
त्यस्तै भीरमुनीमा आयोजित कार्यक्रममा सम्मान गर्दै रेडक्रस म्याग्दीका उपसभापति अमर बानियाँले संसारका १५ लाखभन्दा बढी मानिसहरु रेडक्रसमा आबद्ध रहेको जानकारी दिए । उनले रेडक्रसले सधैं मानवीय क्षेत्रमा काम गर्दै आइरहेको बताउँदै समुदायमा रेडक्रसले खेलेको भूमिका र पु¥याएको योगदान महत्वपूर्ण रहेकोमा जोड दिएका छन् ।
सोही कार्यक्रममा बोल्दै बेनी नगरपालिका–५, पुलाचौरका वडा अध्यक्ष लक्ष्मण बानियाँले सामाजिक क्षेत्रमा रेडक्रसले आफ्ना गतिविधिहरुलाई सक्रिय बनाएको बताउँदै आगामी दिनमा पनि रचनात्मक कार्यलाई निरन्तरता दिन आग्रह गरेका छन् ।
उक्त कार्यक्रमको अवसरमा रेडक्रस उपशाखाको पूर्व सभापति समेत रहेका जिल्ला उपसभापति अमर बानियाँले आठहजार आठसय ८८, उपशाखाका सल्लाहकार मिनबहादुर बानियाँले सातहजार सातसय ७७, सम्मानित व्यक्तित्वद्वय यामबहादुर बानियाँले छ हजार छसय ६६ र यादवप्रसाद पौडेलले पाँचहजार पाँचसय ५५ रुपैयाँ सहयोगको घोषणा गरेका छन् ।
यस्तै बेनपा–५, डडुवाका यामबहादुर केसीले रेडक्रसलाई २५ हजार रुपैयाँ सहयोगको घोषणा गरेका छन् ।रेडक्रस उपशाखा सभापति शिव बानियाँको अध्यक्षता, उपसभापति मिना शाहीको स्वागत र सचिव रेशम बानियाँको सञ्चालनमा सम्पन्न कार्यक्रममा सल्लाहकार मिनबहादुर बानियाँ, सम्मानितद्वय याम बानियाँ र यादव पौडेलले मन्तव्य राखेका थिए । कार्यक्रममा म्याग्दी जिल्लामा ६० पटकसम्म रक्तदान गरेका रेडक्रस म्याग्दीका उपमन्त्री सुरत केसीको विशेष उपस्थिति रहेको थियो ।
त्यस्तै उपशाखाले विपन्न परिवारतर्फ बेनपा–५, भीरमुनीका नरबहादुर खत्री, खड्गबहादुर खत्री, खोरगैराका दुर्गाबहादुर नेपाली, डडुवाका यज्ञबहादुर कार्की, पुलाचौरकी भुम्ला नेपाली, पुरुण्डीका सुकमाया नेपाली र कालिका नेपाली, पौलस्त्य आश्रममा बस्ने हिरामती सुवेदी र कपिलेश्वर आश्रमकी दलिकला सुवेदीलाई खाद्यान्न तथा आर्थिक सहयोग गरेको छ । उक्त अवसरमा बेनीको हाँडेभीरका कुलदिप जुग्जालीले नरबहादुर खत्रीको मुटु रोगबाट ग्रसित श्रीमतीका लागि ६५ केजीको अक्सिजनसहितको सिलिण्डर सहयोग गरेका थिए ।
