खड्गभवानी कोतमा मौलो पूजा, सहकाल र समृद्धिको कामना

म्याग्दीको बेनी नगरपालिका २ ज्यामरुककोटमा अवस्थित ऐतिहाँसिक तथा सामरिक महत्वले युक्त खड्गभवानी कोतमा समृद्धि र सहकालको कामना गर्दै सामुहिक रुपमा मौलो पूजा गरी टीका ग्रहण गरिएको छ ।

घटस्थापनादेखि वडादशैंको दिनसम्म दुर्गा भवानीको पूजा अर्चना गरी कोत परिसरमा रहेको शक्तिको प्रतिक मौलोमा दहि र अक्षता चढाई,समृद्धि र सहकालको कामना गर्दै प्रसाद स्वरुप टीका ग्रहण गरिएको हो । मौलोमा कोट पूजा तथा गुठी व्यवस्थापन समितिका अध्यक्ष रामकृष्ण घिमिरे,स्थानीय जेष्ठ नागरिक,स्थानीयवासी,पूजारी,उपासु तथा सर्वसाधारणले दही र अक्षता चढाउँदै सहकाल र समृद्धिको कामना गरे ।

नेपाल एकिकरण हुनुपूर्व तत्कालिन पर्वत राज्य अन्तरगत पर्ने ऐतिहाँसिक तथा सामरिक दृष्टिकोणले अत्यन्त महत्वपूर्ण मानिएको खड्गभवानी कोतमा परम्परादेखिनै दुर्गा भवानीको पूजा आराधना हुनुका साथै सप्तमीको दिनदेखि नवमीको दिनसम्म वली सहित शक्ति स्वरुपा नवदुर्गा भवानीको विशेष पूजा अर्चना गर्ने परम्परा रही आएको छ ।

कोतको अगाडी रहेको मौलो र हतियार रहेको कोत घर खड्ग भवानी मन्दिरका विशेषता रहेपनि बली दिएका राँगो र खसीको शिर कुन दिशातर्फ फर्कन्छ र घटस्थापनाको दिनमा बालिएको वत्ति दशमीका दिनसम्म निभ्छ की निभ्दैन भन्ने विषयले निकै महत्व पाउने स्थानीय बृद्धबृद्धाहरुको भनाइ रहकेो छ ।

तत्कालिन राजा भर्तिवम मल्लको दरवारलाई उनको मृत्युपछि कोत वनाइ राजाले प्रयोग गरेका हातहतियार,ढाल,तरवार लगाएतका सामानहरु राखिएको खड्ग भवानी कोत ऐतिहाँसिक दृष्टिकोणले मात्र नभै प्राकृतिक सौन्दर्य र पर्यटकीय दृष्टिकोणले समेत महत्वपूर्ण रहेकोले यसको विकासका लागि वडा कार्यालयालले पहल गरिरहेको र पदमार्ग लगाएतका केही पूर्वाधारहरु निर्माण भैसकेका बेनपा २ का वडाअध्यक्ष हिरावहादुर थापाले बताए ।

वडाअध्यक्ष थापाका अनुसार खड्गभवानी कोतसंग म्याग्दी जिल्लाकै इतिहाँस र वाइसे चौविसे राज्यको वास्तविकता गाँसिएकोले कुरिलाखर्क महारानी,बेनीको शिवालय मन्दिर,निरयघाट,ढोलठान र ताकमकोटसंग ज्यामरुककोटको ऐतिहाँसिक सम्वन्धको वारेमा खोजीनीति समेत भैरहेको छ ।

वडादशैंको शुभकामना दिँदै वडाअध्यक्ष थापाले गौरवमय इतिहाँस रहेको ज्यामरुककोटलाई देश विदेशमा परिचित बनाउन र यसको विकास गर्न सवैले आआफ्नो ठाउँबाट सक्दो सहयोग गर्न आग्रह समेत गरे ।